Нидн Хальмг Таңһчин социальн делгрлтин, күч-көлснә болн көдлмшәр тетклһнә министерств олн үртә өрк-бүлмүд дунд «Өрк-бүлин сән гисн эдл-аху» гидг марһа хойрдад давулсн билә. Терүнд орлцачнр дунд сән гисн крестьянск-фермерск болн онц эдл-аху бәрдг өрк-бүлмүд йилһҗ авгдсмн. Крестьянск-фермерск эдл-аху бәрдг өрк-бүлмүд дунд Яшкулин районд бәәдг Манджиевихн диилвр бәрснь бахмҗта болсмн.

Эн телесоңсхвриг нег селәнә тууҗ гиҗ нерәдҗ болхмн. Хальмг эҗго теегт элстә һазрт орс -хальмг хойр үр залус урһа модд суулһсна тууҗ соньн мөн. Тер модд урһад, элстә һазрт уңгнь батрад, зер-земш өгдг болад, бүкл района әмтиг әмтәхн хотар теткҗ йовсмн. Көтчнрә районд Шатькон садын тускар меддго күн уга бәәсмн. Дәәнә хөөн хойр үр урһа модд суулһад, әмтнд туслсна туск телесоңсхвр Әрәсән телекиномарһанд йовулгдсн билә.

Хальмгт бәәтхә цуг Әрәсәд нертә номт, багш, бичәч, урн үгин үүдәврмүдин шалһач, олн дегтрмүдин болн статьясин түүрвәч Манҗин Николай шидр 75 җилә өөнән темдглв. Ончта өөнләнь йөрәхәр олн улс А. Амр- Санана нертә дегтрин саңд цуглрҗ ирв. Медәтнр, дундын наста әмтн, баһчуд дегтрин саңгин көдләчнр белдсн һәәхүллә таньлдв. Манҗин Николайин һучн һар дегтрлә, олн седкүлд һарсн статьясла ирсн улс таньлдв. Хәәвр-шинҗллт кеһәд бичсн дегтрмүдинь меддг бәәсн бийнь әмтн Манҗин Николайин олн дегтр үзҗ икәр өврв.

Хальмг Таңһчин Толһач Хаска Бату регионмудын делгрлтин халхар Әрәсән залврин Ахлачин дарук Марат Хуснуллинә һардврт болсн селвлцәнд орлцв.
– «Җирһлин сән таал тогталһн» болн ЖКХ-н халхар күцәгдҗәдг төсвсин тускар күүндвр болв. Җилин түрүн дөрвн сарин ашнь диглгдв. Онц оньган тусхадг шаңһа төвд, нег үлү Марат Шакирзяновичд ик ханлтан өргҗәнәв, – гиҗ Бату Сергеевич темдглв.

Таңһчин Толһач Хаска Бату ЮФО-д Әрәсән Президентин күцц зөвтә элч Владимир Устинов давулсн селвлцәнд орлцв. Өрк-бүлин чинриг өөдлүллһнә төрмүд терүнд босхгдв.

Хальмгин селәнә эдл-ахун министр Гаван Тимур тохма мал өскчәдг таңһчин эдл-ахусин һардачнрла селвлцә давулв. Эн харһлтд шаңһа дем йилһҗ өглһнә төрәр күүндвр болв.

Урҗ өдр Ростов-на-Дону балһснд Әрәсән Өмн үзгин парламентск Ассоциацин 25 җилин өөнд нерәдгдсн байрин хург болв. ЮФО-д Әрәсән Президентин күцц зөвтә элч Владимир Устинов, Әрәсән Федерацин Хүүвин Ахлачин дарук Андрей Яцкин, Әрәсән Орн-нутгин Хүүвин Ахлачин дарук Виктория Абрамченко болн Ростовин мүҗин һардач Юрий Слюсарь терүнд орлцад, ниицәнә ханьд ордг регионмудын зака үүдәгч бүрдәцсин элчнриг йөрәв. Хальмг Таңһчин Улсин Хуралын (Парламентин) Ахлач Артем Михайлов байрин керг-үүлдврт бас орлцв.

Шидр Әрәсән ФМБА-н оториноларингологийин номин шинҗллтин төвин Әәдрхнд үүлддг әңгин мергҗлтнр мана таңһчд ирв. Эдн таңһчин әмтнә эрүл-мендин бәәдл шинҗлсн деерән хальмг эмчнрлә «төгрг ширән» сүүр давулҗ, эмнлһнә төрмүдәр күүндв. Харһлтын йовудт таңһчин эмчнр Әәдрхнә төвин улд мергҗлтән өөдлүллһнә төр бас босхв.

Мөрн сарин 21-д Манҗин Аркадин нертә Хальмг филармоньд «Духовная аристократия степи» гидг соньн нәр олна оньгт тусхагдсн билә. Энүнә тускар тодрхаһар седкүлчнрлә болсн харһлтд Хальмгин билг-эрдмин ачта үүлдәч Татьяна Милованова болн Әәдрхнә музей-заповедникин һардачин дарук, тууҗ номин доктор, буддолог-номт Андрей Курапов келҗ өгв.

Дөчн җил хооран мөрн сарин 26-д Чернобылин АЭС-т аюл учрад, олн-әмтнд ик әәмшг учрасмн. Терүнә ашинь уга келһнд Советин Союзин булң болһнас, тер тоод Хальмг Таңһчас, кесг зун миңһәд күн орлцад, әмән әрвллго залу-зөрмгән үзүлсмн. Мана бичкн таңһчас 1670 күн Чернобыльд учрсн аюлын аш уга келһнд орлцсмн, теднәснь эндр зуг 360 күн әмд бәәнә. Харм төрхд, эднә эрүл-мендин бәәдлд ик харшлт күрггдснә ашт цуһар олн зүсн шалтгта улс болна. Мана таңһчд «Союз Чернобыль» гидг олна ниицәг һардҗадг Һучна Борис үүрмүдиннь санл мөңкрүллһнә кергиг күцәҗ йовна. Шидр бидн Борис Букиевичлә харһад күүндвидн.