Хальмг Таңһчин социальн делгрлтин, күч-көлснә болн көдлмшәр тетклһнә министр Нахошкинә Мингиян медәтнрин болн гемтә-шалтгта улсин гер-интернатд шин бәәрин тосхлтын йовудыг бүрткв. Эн бәәрн «Өрк-бүл» гидг келн-улсин төсвин йовудт тосхгдҗана. Энд хоорндан залһлсн дөрвн гер тосхгдхмн, тенд эмнлһнә болн реабилитацин 80 ормта болн 120 күн бәәдг әңгүд үүлдхмн. Медәтнрин болн эрмдгтә улсин төлә өдгә цага сән таал тогтагдсн деерән энд цогц-махмудан батрулсн деерән олн зүсн нәр-наад давулдг, фильмс хәләдг хорас секгдхмн.

Сурһулин шин җил угтад, мана таңһчд «Бичкдүдиг сурһульд белдхд нөкд болтн» гидг буйнч седклин керг-үүлдвр давҗана. Җирһлин күнд таалд туссн өрк-бүлмүдт дөң-нөкд болад, бичкдүдиг хувц-хунрар, сурһульднь кергтә эд-таврар теткҗәнә.

Цергә шишлң керг-үүлдврин ветеранмуд орн-нутгин болн регионмудын олна бәәдл-җирһлд шунмһа кевәр орлцад, йосна бүрдәцсин үүлдврт орлцх зөвтә гиҗ Әрәсән Президентин заавр дигтә-даратаһар бәәдл-җирһлд тохрагдҗахнь лавта. Орн-нутгин дуһргудыг болн олна бүрдәцсиг эдн чадмгар һардҗана, залврин ханьд дааврта үүлд батлгдсн бәәнә.

Хальмг Таңһч-Беларусь: нөкцлт өсәд-өргҗәд йовтха!
Элстин һәәхмҗтә ормсар.

Урҗ өдр «Справедливая Россия» партин Хальмг Таңһчин әңгин элчнр седкүлчнрлә харһҗ, Әрәсән орн-нутгт миграцин болн социальн-экономикин халхар үүдсн сурврмудар цәәлһвр өгв.

Хальмг Таңһчин эрүл-менд харлһна министрин үүл дааҗадг Мушаран Арслң болн Элст балһсна прокурор Һәрән Баатр П.Жемчуевин нертә таңһчин эмнлһнд одад, әмтиг соньмсулҗадг төрмүдәр цәәлһвр өгв. Таңһчин эмнлһнә ах эмч Чумпинә Саглрин темдглсәр, иим харһлтс олзта-туста болна.

Эн өдрмүдт мана таңһчд «Бичкдүдиг сурһульд белдхд нөкд болтн!» гидг буйнч седклин керг-үүлдвр давҗана. Олн үртә, баһ тетквртә өрк-бүлмүдин бичкдүдт сурһульднь кергтә эд-тавр, хувц-хунр болн нань чигн кегдлмүд хулдҗ авхин төлә арһлачнр, таңһчин бүрдәцс мөңг һарһҗ эн кергт орлцҗана. «Дари добро» гидг буйнч седклин олна саң җил болһн таңһчин райодын селәдт бәәдг өрк-бүлмүдт демән күргнә.

Ик Буурла района Приманыч селәнд бәәдг Санчра Екатерина буудя хадһлдг бүрдәцд 1983 җиләс авн көдлҗәнә. Ирх җилд медәт 80 насна өөнән темдглхмн, болв эн эндр күртл көдләд, тәрәчнрин хураҗ авсн буудяг дигтә-даратаһар тоод авч, кергән үнн кевәр күцәҗәнә.

Олн үртә, баһ тетквртә өрк-бүлмүд социальн бооца батлад, шаңһа дөңгәр тааста кергән делгрүлҗ чадна. Нег үлү эннь селән һазрт бәәдг улст туслна. Октябрьск района Цаһан Нур селәнд бәәдг олн үртә Очра Инҗр (зургт) нидн района әмтнә социальн харслтын цергллтд бооца батлад, һуйрин зүүтә әмтәхн эдл-ууш кеҗ-һардг болв.

Шар шаҗна үүлдәчнрин IV нарт-делкән ик хург төгсв. Өдгә цагт ик чинр зүүҗәдг эн хург тууҗд орв. Бурхн Багшин номин цаарандк делгрлтд сойлын залһлдана, өвкнрин авъясмуд хадһллһна, әмтн хоорндан ниитәһәр бәәлһнә тускар күүндвр болв.
Ноха сарин 17-ас авн 20 күртл болсн делкән ик чинртә хургин орлцачнрт Әрәсән Президент Владимир Путин йөрәлин бичгән илгәсмн. Әрәсән улсин ниицлтин җилд болсн шаҗна үүлдәчнрин нарт-делкән ик хургин чинр темдгләд, улсин хоорндк залһлданд, эвин болн нөкцлтин бәәдл тогталһнд эн керг-үүлдврин чинриг Владимир Владимирович өөдән үнлв.