Таңһчин җирһлд зөвтә орман олҗ, удан цагт тодлгдх Ярне шаҗна йосрхл күцәмҗтәһәр төгсв. Зун җилин туршарт кегдлго бәәсн шаҗна йосрхл Хальмгин Төв хурлд түрүн болҗ эн зунар күцәгдв. Хальмгин гелңгүд 45 хонгтан ном умшҗ Ярне йосхрлд бәәв. Энүнә йовудт гелңгүд Бурхн Багшин ном сергәҗ, шинәс умшҗ, тер номин цәәлһвр өглһнд килмҗән һарһҗ зальврв. Тиигәд цуг әмтә тоотд туслх буйнта үүлдвр күцәлһнд олзлгдх медрлән эдн улм гүүдүлв.

Хальмг Таңһчин йосна, сойлын болн олна үүлдәч, шүлгч, номт Санҗин Николайин 70 җилин өөнд нерәдсн керг-үүлдврмүд таңһчд давв. Билгтә үрнә неринь мөңкрүллһнд нерәдсн байрин хургудт болн харһлтст олн күн орлцв.
Эн җилин һаха сарин 11-д А. Амр-Санана нертә Келн-улсин дегтрин саң таңһчин сойлын болн зуульчллһна министерствин дөңгәр Санҗин Николайин үүдәврмүдин умшлһ бүрдәв.

Һаха сарин 15-д Төрскән харсгч Алдр дәәнә цагт улсин күч-көлснә туурмҗин санлын өдр темдглнәвидн. Дигтә найн тавн җил хооран Әәдрхн Кизләр хоорндк төмр хаалһ экләд тосхгдв.

Һаха сарин 14-15-д Улан Баатр балһснд Әрәсән болн Моңһлын регионмудын хоорнд экономикин залһлда делгрүллһнә төрәр II хург болв. Йосна бүрдәцсин, бизнесин элчнр, шинҗләчнр, ут тоодан Әрәсән болн Моңһлын 220 элч эн хургин көдлмшт орлцв.

Эн өдрмүдт Екатеринбург балһснд баһчудын болн оютнрин нарт-делкән наадм болв. Хальмг Таңһчиг энд Хальмг ик сурһулин оютнр элчлв. Мана делегациг ик сурһулин һардачин дарук Мингиян Надбитов һардҗана.

Шидр Хальмг Таңһчин эрүл-менд харлһна министрин үүл дааҗадг Мушаран Арслң Лаганя районд керг-төрин халхар одв. Района эмнлһнә ах эмч Шарапа Николай энүнд эмнлһнә әңгүдин үүлдвр яһҗ бүрдәгдсиг цәәлһәд, энд олзлгдҗадг кергсл үзүлв.

Липецк балһснд һаха сарин 7-ас авн 11 күртл «Төрскн келнә болн утх - зокъялын сән гисн багш» гидг Цугәрәсән марһан болв. Эн җил марһанд Әрәсән 87 регионас 131 багш болн бичкдүдин садмудын сурһмҗлачнр орлцв.

Эн җил Хальмг ик сурһулин 46 оютн Әрәсән Президентин болн орн-нутгин Залврин мөрәһәр ачлгдв. Иим ончта йовдл түрүн болҗ учрснь темдгтә. Мөрәлгдсн баһчуд дунд хальмг кел шинҗллһнә болн дорд үзгин күрәлң төгсәсн Елизавета Кузнецова заагдв. Билгтә оютн РФ-н Залврин мөрәһәр ачлгдад, сар болһн немр мөңг авхмн.

Хальмг Таңһчин социальн делгрлтин, күч-көлснә болн көдлмшәр тетклһнә министерств һурвн җил дарандан олн үртә өрк-бүлмүд дунд «Сән гисн өрк-бүлин эдл-аху» гидг марһа давулҗана. Шидр терүнд диилвр бәрсн өрк-бүлмүд йилһҗ авгдв. Келхд, әмтн дууһан өгәд, бийснь дииләчнриг шүүҗ авсмн. Лаганя района Красинское селәнд бәәдг өнр-өсклң Лиджиевихнә өрк-бүлин төлә олн-әмтн хамгин олар дууһан өгәд эдн диилвр бәрәд, 100 миңһн арслңга мөрәһәр ачлгдх болв.

Шидр Энткг нутгт болсн БРИКС-ин XVIII хургин сүүрт Әрәсән Президент Владимир Путин орлцв. Орн-нутгудын толһачнр экономикин, сойлын, әәмшг уга бәәдл тогталһна болн талдан төрмүдәр нөкцлтхин тускар күүндв.