Дәәнд әмнәсн хаһцсн дәәчнрт нерәдгдҗәнә

14-05-2020, 17:48 | Таңһчин зәңгс » Сойл

Советск Әәрм Төрскән харсгч Алдр дәәнд диилвр бәрснә 75 җилин өөн одахн күцв. 2020 җил санлын болн туурмҗин Өдр гиҗ зарлгдв. Мана таңһчин үүдәгч улс Алдр Диилврин ончта өөнд билгән һарһҗ, үүдәлтән нерәднә.
Хальмгин улсин шүлгч, көгҗмч, таңһчин сойлын ачта көдләч Увшан Альчан Иван дәәнә туск олнд темдгтә кесг дууна үгмүдинь орс келнәс хальмг келнд орчулсмн. Тер тоод әмтнд тааста «Катюша» болн «Смуглянка» гидг дуд хальмг келнд орчулсн болдг. Дуучнр эн дуудыг өргмҗтә кевәр төрскн келәрн дуулна. Алдр Диилврин 75 җилин өөнд нерәдәд, байрин өдрин өмн өргнд Увшан Альчан Иван «Диилврин Өдр» болн «Журавли» гидг олна седкл авлсн дуудын үгмүдинь хальмг келнд орчулв.
Нернь туурсн шүлгч Расул Гамзатов аварск келәр бичсн шүлгиг Наум Гребнев орс келнд орчулсмн. Тер шүлг билгтә дууч Марк Бернесин седклинь үүмүләд, зүркинь догдлулв. Тегәд эн үгмүдиг көгҗмд буулһхиг нертә көгҗмч Ян Френкелиг сурв. Көгҗмч хойр сарин эргцд эн шүлгт айс үүдәв. Тиигәд «Журавли» гидг дәәнә туск гейүртә гисн дун төрв. Марк Бернес түрүн болҗ эн дууна айсинь соңсхларн, нульмсан бәрҗ чадлго уульв. Тиигтлән дун энүнд таасгдв. Күнд гемтә болв чигн Марк Бернес «Журавли» гидг дууг дуулҗ, бичҗ авв. Терүнә хөөн өңгрҗ одв. Тиигәд эн дун энүнә сүл дуулсн дун болв.
Дәәнә туск кесг орс дуд ямаран чигн талын келәр дуулна. Увшан Альчан Иван хальмг келнд буулһсн олнд тааста, әмтнә седклд өөрхн «Журавли» гидг дууг мана билгтнр ода хальмг келәр дуулҗ чадҗана. Мадн эн дууна үгмүдинь умшачнрин оньгт тусхаҗанавидн.

«Тоһруд» («Журавли»)

Үгнь Расул Гамзатовин, көгҗмнь Ян Френкелин
Хальмг келнд орчулснь Иван Убушаев


1. Улан салдс, мана салдс… Ухалхла:
Унтсн уга, - шовуд болҗ хүврлә.
Цаһан тоһрун теңгрүр, хәләхлә,
Цаган медәд, цувад, нислдлә.

Теңгрүр мадн, олн җилд, ширтәд,
Тер доңһдсн ду соңснавидн.
Харань тасртл хәләһәд,
Халта мадн гейүрнәвидн.
Давтвр: М – м – м – м – м…

2. Тиньгр асхар, будн һатц, өрүһәр,
Теңгр керчәд шовуд нислднә.
Тедн дотр, - үчүкн кемтркә.
Тернь – мини орм. Күләҗәнә…

Цагнь ирәд, би тоһрунлаһан ниилҗ,
Цаһан җиврәрн сәвхв.
Теңгрәс уданар доңһдҗ,
Тадниг ардан үлдәхв…
Давтвр: М – м – м – м – м…


Барт белдснь МАНҖИН Амулң

#СпасибоЗаПобеду #ЭтотДеньПобеды #ГероиКалмыкии #ГероиПобеды #75летПобеды #Победа08 #ПобедаКалмыкия #ПесниПобеды

Видео