Салдсмудын тааста дун

25-05-2020, 13:57 | Таңһчин зәңгс » Сойл

Дәәнә цагт үүдәсн олн дун салдсмудын седклинь авлҗ, сүрә өгч, урмд өгдг бәәсмн. Дәәнә цагин дуунд күчр-күнд, әәмшгтә бәәдлин тускар, залу-зөрмг йовдлын тускар, салдсмудыг гертнь иньг-амргнь, өөрхн улснь итклтәһәр күләҗәснә тускар келгднә. Тер дууна үгмүдәс дәәнә тууҗин тускар чигн медҗ болхмн.
Төрскән харгсч Алдр дәәнә җилмүдт шүлгч Алексей Сурков «Красноармейская правда» гидг газетин зәңгч болҗ көдлҗ, дәәллдән болҗасн һазрт йовсмн. 1941 җилин ноябрь сард Москван харслтын төлә болсн дәәллдәнд орлцҗ,, берк догшн дәәллдәнд орлцҗ, немшнрин бүслврәс әрә гиҗ мөлтрҗ һарсмн. Терүнә хөөн нег сө унтлго, авальдан бичг бичҗәһәд, шүлг үүдәсмн. Хөөннь, 1942 җилин февраль сард, цергә газетин редакцур көгҗмч Константин Листов күрч ирәд, дәәнә туск ду үүдәхәр бәәнәв, үгмүд хәәҗәнәв гиҗ келҗ. Тиигхләнь Алексей Сурков тер бичсн шүлгән өгч. Цөөкн хонг давсна хөөн Константин Листов дәкнәс редакцур ирҗ, терүнә шүлгт бичсн шин дууһан редакцин көдләчнрин оньгт тусхав. Газетин редакцин зург цокач Михаил Савин тер дарунь айсинь тодлҗ, гитар цокч, шин ду дуулв. Дун дәәчнрт ик гидгәр таасгдҗ, олн дунд тарв.
«В землянке» гидг дууг най шаху җил хооран үүдәсмн. Эндр өдр чигн әмтн эн дууг ик таастаһар дуулна. Әмтн талын келнд буулһҗ чигн энүг дуулна. Нернь һарсн шүлгч, көгҗмч Иван Убушаев Алдр Диилврин 75 җилин өөнд нерәдҗ, «В землянке» гидг дууна үгмүдинь хальмг келнд орчулв. Ода мана билгтнр эн дууг төрскн келәрн дуулҗ чадҗана.

«Һазр герт» гидг дун
(«В землянке»)

шүлгнь Алексей Сурковин
көҗмнь Константин Листовин
үгнь хальмг келнд орчулснь Иван Убушаев


1. Һалан түләд суунав.
Салм, хәләхлә, - нульмсн…
Гармаһан дахад дуулнав.
Санандм – чини дурн.
Урһмл нанд шимлдҗ,
Ухана хуҗрим саатулна.
Әмд дууһим хавлҗ,
Әмим иньгм харулна.
2. Күрн гихлә, - зовлңта.
Көлгн болг, - дашката.
Хол һазринь яахв?
Хортна суминь яахв?
Изгүләд гармаһан татнав!
Итклтә җирһлм геедршго!
Һазр герт дуулнав!
Һалын заль унтршго!


Барт белдснь АРЗАН Маргарита

Видео