Эргндк бәәдлиг цеврәр бәрхин төләд

28-05-2020, 16:57 | Таңһчин зәңгс » Эндрк ґдрин тґрір

Әмтнә өдр-бүрин бәәдл-җирһлин йовудт болн күцәҗәх үүлдврин ашт дала хог-бог болн хотын үлдл һарна. Сүл цагт хог-богиг зүсәрнь хуваҗ, дигләд эд-бод келһнә кергт өгдгнь делгрлт авчана. Эннь чинртә йовдл гиҗ сангдна. Тер юңгад гихлә альд чигн әмтн экологийин төриг босхҗ,, яһҗ эн нәрн төриг хаһлҗ болхин тускар ухалҗана. Европин орн-нутгуд олн җил хооран хог-богиг зүсәрнь йилһҗ, хурадг болв. Әрәсәд болн СНГ-н орн-нутгудт зуг сүл цагт хог-богиг зүсәрнь хуваҗ диглдг дасчана. Мана орн-нутгин күн болһн җилдән гертәсн болн көдлдг һазрасн 500 шаху киил хог-бог һарһҗ хайна.
Үнәр келхлә, йириндән хог-богиг зүсәрнь йилһҗ диглдгнь энтн амр юмн. Ташр хог-богин ик зууһинь эндр өдр олн зүсн организацст өгч болхмн. Эннь нег үлү амр болҗана. Тегәд чигн Хальмгт хог-богиг зүсәрнь хуваҗ дигллһнә туст цуг таал бәәнә гиҗ таңһчин жилищн-коммунальн эдл-ахун болн энергетикин министерствин барин цергллт зәңглҗәнә.
Тегәд чигн бийәсн эклҗ, гертән хог-богиг зүсәрнь хуваҗ диглдг дасх кергтә. Хотын үлдлиг, пластик, шил, цаас салу цуглулҗ болхмн. Кесг зүн пластикиг эд-бод кеҗ, дәкнәс олзлна. Болв зүсн-зүүл эд-тавр эд-бод кегдхш. Тегәд чигн тиим эд-тавр айстан хулдҗ авад керг уга. Аһарт нискдг шармуд байрин керг-үүлдвмрүдин төлә хулдҗ авна. Иим шармуд эд-бод келһнд олзлгдхш. Ташр энтн һазр деер удан цагт кевтҗ, эргндк йиртмҗиг бузрдаһад, аң-аһрусна эрүл-мендд хорлтан күргнә. Тегәд чигн тиим шармуд хулдҗ авад, олзлад керг уга.
Дәкәд болхла олна хот белддг ормст кофе пластиков стаканд кенә. Тиим пластиков стакаг бас эд-бод кехш. Тегәд чигн һаза амрад йовсн кемд арһта болхла олн дәкҗ олзлгддг ааһ бийләһән авч, эврә ааһдан кофе кеҗ уухла сән болхмн. Пластиков пакет олзллго кенчр дорвад хулдҗ авсн эд-тавр дүрхмн. Дәкәд болхла эд-тавр хулдҗ авхла, терүг орасн упаковкд бичәтә цәәлһвринь оньган өгч умшхмн. Кемр эд-таврин пластиков упаковнь эд-бод кегддго болхла, тиим упаковта эд-тавриг икәр хулдҗ авад керг уга. Ямр нег эд-таврин упаковнь шинҗләд хулдҗ авхла, хог-богиг йилһәд хуваһад бәәхлә, мадн эргндк бәәдлиг харлһна кергт болм тәвцән орулҗ чадхвидн. «Хөөткән сансн цецн» гидг хальмг үлгүр бәәдг биший. Тиигәд мадн хог-богиг зүсәрнь йилһҗ , хуваҗ дигләд, эргндк бәәдлиг ясрулхар зүткәд бәәхлә, мадн иргч үйнрин төлә йиртмҗиг хадһлҗ чадхвидн.

АРЗАН Маргарита

Эргндк бәәдлиг цеврәр бәрхин төләд

Видео