Эрдмдән итклтә күн

16-07-2020, 10:01 | Таңһчин зәңгс » Күн болн җирһл

Таңһчд үүлддг Әрәсән ФССП-н Заллтд үннч седклтә, чаңһ-чиирг, төрскн һазр-усндан эңкр, эрдмдән дурта, эврә кергт итклтә залу улс цөн биш. Теднә негнь Пүрвә Мушаев мөн. Эн баахн күн Элст балһснд Санал Петрович Мушаевин болн Маргарита Владимировна Мучкаеван өрк-бүлд төрсмн. Аавнь ачнртан Пүрвә болн Бальҗр гидг ховр сәәхн нерд өгсмн. Эк-эцкнь хойр үрән эңкрлҗ, ик оньган тусхаҗ, чик сурһмҗ өгч, өскҗ-босхҗ, сурһуль-эрдм дасхсмн.
Муушан Пүрвә бичкн цагтан Эмба Манджиев һардҗ йовсн «Герл» ансамбльд ордг билә. Нернь туурсн биич болн хореограф Эмба Манджиев энүнд хальмг би дасхҗ йовсиг Пүрвә ханлтта седклтәһәр тодлҗ, ик бахмҗ кенә. Ямаран нег байрин керг-үүлдврт, нәәрт эн баахн залу сәәхн биилҗ, билгәрн әмтнд байр үүдәнә. Дәкәд болхла дунд сурһульд йовсн цагас авн футбол болн баскетбол наадхдан эвтә. Элстин классическ гимназьд хамдан сурч йовсн үүрмүдтәһән спортивн марһаст орлцҗ, нүүрлгч орм эзлдг билә.
Пүрвә дунд сурһулян төгсәснә хөөн Аһш балһснд нефтин болн газин колледжд сурв. Сурһулян чиләһәд, невчк зуур эрдмәрн көдлҗәһәд, цергт мордв. Цергәс бууҗ ирснә хөөн авсн эрдмәрн көдлмш олҗ чадлго бәәв. Дарунь МАЭП-ин филиалд юристин эрдмәр сурч, ик сурһуль төгсәв.
Урднь таңһчд үүлддг Әрәсән ФССП-н Заллтд Пүрвән эцкнь Санал Петрович көдлҗ йовла. Болв күнд гемин зүүләр сәәһән хәәв. Тегәд чигн Пүрвә эцкнь көдлҗ йовсн ормд ирҗ көдләд, ода эцкиннь кергиг цааранднь кеҗ йовна гиҗ келхлә чик болхмн. Кесг җилин эргцд таңһчд үүлддг ФССП-н Заллт эцкиннь, Мушаев Санал Петровичин, санлд нерәдсн футболар турнир бүрдәнә. Урднь эн марһанд зөв-йос харлһна халхин элчнр шунҗ орлцдг билә. Болв сүл җилмүдт Элст балһснд болн таңһчин райодт көдлҗәдг зарһин приставмуд чидлән сөрҗ, хоорндан дөрлднә.
Муушан Пүрвә зарһин приставмудын цергллтд көдлмшт орснас нааран медмҗән угаһар арвн җил давв. Түрүн авгтан Ик Царң селәнд ОУПДС-ин приставар экләд көдләд, дамшлт авв. Хөөннь Элстд зарһин үүлдврин диг-дараг тетклһәр үүлддг пристав болҗ көдлв. Муушан Пүрвә өөдән мергҗлттә, эврә кергән йилһән сәәнәр меддг көдләч мөн. Тегәд чигн энүнә һардвр күцәмҗтә үүлдвринь темдгләд, энүг өөдлүлсмн. Сәәхн седклтә, олнла ээлтә, келсн үгдән күрдг, үннч Пүрвә Саналович хамдан көдлдг улс, үүрмүд болн элгн-садн дундан күндтә, тоомсрта күн.
Пүрвә Саналович өрк-бүлтә, Светлана Геннадьевна авальтаһан ниитәһәр, сән-сәәхн бәәҗ, Вера күүкән болн Санл көвүһән таалҗ, эңкрлҗ, өскҗ-босхҗана. Пүрвә Саналович спортар соньмсна, чик авг-бәрц бәрнә. Тер мет үрн-саднаннь седклинь бас спортд тусхана. Тегәд чигн Вера күүкнь художественн гимнастикәр дамшна. Пүрвә Саналович сул цаган өрк-бүлтәһән давулхдан дурта. Өрк-бүләс даву кишг эн һазр деер уга гиҗ эн тоолна.

АРЗАН Маргарита

Видео