Дулаллһна кемд белдҗәнә

17-07-2020, 17:36 | Таңһчин зәңгс » Эндрк ґдрин тґрір

Зуни цагт «Энергосервис» АО-н көдләчнрт көдлмш дала болна. Эн һаң халун, цунцг өдрмүдт эдн гүҗрҗ көдлҗ, намрин-үвлин кемд белдврин көдлмш кеҗәнә. Эдн ода кеҗәх көдлмшәс 2020-2021 җилин дулаллһна кем ирлцҗәнә. Зунар эдн арднь орҗ көдлҗ, сән белдвр кехлә, намрин-үвлин кемд эднд көдлхд амр болхнь маһд уга. Кеҗ-күцәҗәх көдлмшин кемҗәһинь медхин төләд баһ-саһар то-дигинь зааҗ, келҗ өгнәвидн. Элст балһснд 29 котельн көдлҗ, 369 олн давхр гериг дулалһна, 141 олн давхр гериг халун усар теткнә. Тер мет 461 предприятиг болн бүрдәцсиг, тер тоод 77 социальн чинртә объектиг теткнә. «Энергосервис» компаня теткврт балһсна әмтнә ик зунь бәәдг олн давхр гермүд бәәнә гихлә чик болхмн. Тегәд чигн Элстин һардвр дулаллһна кемд белдврин көдлмш келһнә чинртә төрт онц оньган тусхана.
Одахн мана зәңгч «Энергосервис» АО-н хамгин ик гисн 6-ч тойгта салврт одв. Энд участкин ахлач Лариса Савина иргч дулаллһна кемд кеҗәх белдврин йовудын тускар келҗ өгв.
- Мадн намртан эклх дулаллһна кемд белдврин көдлмшиг хаврар мөрн сарин дундурас авн эклвидн. Ода мана көдлмшин ашнь ил үзгднә.
«8-ч микрорайон» котельнд 8-9 микрорайодын олн давхр гермүдиг болн 7-микрорайона тавн корпуста 4-ч тойгта гериг халун усар теткдг шин теплообменник углҗ тәвгдв. 8-ч микрорайона 18-ч тойгта олн давхр гер, 9-ч микрорайона 1-ч тойгта олн давхр гер, «Бумбин орн» гидг 26-ч тойгта бичкдүдин сад тал дула болн халун ус өгдг турвас сольгдв. Тер мет 18 дуунад дулаһар тетклһнә системиг, 14 дуунад халун усар тетклһнә сурвлҗин турвасиг шинҗлҗ бүртксмн. Эн кемҗәһәрн ик көдлмш өдр-бүрин йовудт кегдв гиҗ салврин ахлач цәәлһҗ өгв.
Лариса Савинан келсәр, К.Илюмжиновин нертә уульнцд бәәршлдг «Школа-интернат» гидг котельн дулаллһна кемд күцц белн болв. Энд дулаһар тетклһнә сурвлҗин 30 метр турва сольгдсмн.
«Котельная 60 Гкал/ч» гидг хамгин күчтә дула өглһнә станц темдглсн зураһар ноха сарин 20-д белн болх зөвтә. Хамгин өндр турвата эн станцин күчнь 32 дуунад татгдсн турвасар 105 объектиг дулаһар болн 96 объектиг халун усар теткхин төләд күртәмҗтә болна. Энтн 7-ч, 8-ч болн 9-ч микрорайодын әмтн бәәдг олн давхр гермүдиг болн кесг социальн чинртә бәәһүлһиг теткнә. Тегәд чигн таңһчин хотл балһсна дорд үзгин бүкл райог теткҗәхнь мөн.
«Энергосервис» АО-н 6-ч тойгта салврин ахлач маднла кесн күүндврт иигҗ темдглв: «Дулаллһна кемд белдврин көдлмш келһнә төлә мана салвриг цуг кергтә тоотар күцц кевәр тетксмн. Тер мет коронавирусн хальдвр гемиг түглһнәс хөрхин төләд маднд медицинск хааһул болн дезинфекц кедг хольвр түгәҗ өгв».
6-ч салврт һурвн котельн болн төв дулаллһна пункт орна. Энд үүлдврин ветеранмуд болн эврәннь кергән йилһән сәәнәр меддг, көдлмшән седклән өгч күцәдг эрдмчнр – слесарь Игорь Водолагин (зургт), һаңначнр Арслан Мухараев болн Владимир Сороматин, котельня оператор Алена Щербак ахта көдлнә.

АРЗАН Маргарита

М.Ушановин цоксн зург

Видео