Тањєчин школмудыг белдљіні

11-08-2020, 09:37 | Таңһчин зәңгс » Сурєуль-эрдм

Эн өдрмүдт Элстд болн райодар сурһульмуд шин җилд яһҗ белдснә туст шишлң комиссьмүд бүртклһ кеҗәнә. Эн саамд хот уудг ик аһусин кергсл дигтә-дарата көдлмш, классмудын хорасин болн шишлң кабинетмүдин бәәдл бүрткгдв. Түүмрәс сагллһна зокал яһҗ күцәгдҗәхинь МЧС-ин мергҗлтнр хәләв. Харм төрхд, цуг сурһульмуд әдл кевәр неквриг күцәһәд уга. Тегәд 17-ч тойгта Элстин сурһуль ода деерән бүртклһиг давҗ һарад уга. Түүмрәс сагллһна цуг диг-дараг эдн күцәх зөвтә, илдксн дуту-дундуг эдн ода уга кеҗәнә.
- Сурһулин бүртклһн ноха сарин 7-д эклв. Ут-турштан долан сурһуль комиссьмүдин гешүдин неквриг күцәҗ бүртклһиг давҗ һарв. Үлгүрнь, 4-ч тойгта сурһульд урзн җил бат ясвр кегдлә, спортзал бүклдән бас шинрүлгдлә, тегәд энд сурһуль сурхин төлә цуг таал бәәнә. Ут тоодан хотл балһснд 22 сурһуль бәәнә, эдн цугтан гилтә сән таалта, болв зәрм сурһульмудт өдгә цагин ора тәвгдх зөвтә, тер көдлмш ода эклҗәнә, җилин чилгч күртл төгсх зөвтә, – гиҗ балһсна сурһуль-эрдмин ахлачин үүл цаг зуур дааҗах Артан Елена эклсн керг-үүлдврин түрүн ашин тускар келҗ өгв.
Сурһульмудыг болн бичкдүдин садмудыг сурһулин шин җилд белдлһнә төр Элстин һардврин һол оньгт бәәнә. Бүртклһиг сәәнәр давҗ һарсн бүрдәцсин тоод Басан Городовиковин нертә 18-ч тойгта сурһуль йовна. Эдн багшнрин болн техническ көдләчнрин дөңгәр эврә чидләр ясврин көдлмш күцәһәд сурһулян шин җилин өмн өргнд шинрүлв. Сурһулин директор Цевгин Нәәмнә келсәр эднд ясврин үүрмг көдлмш келһнә төлә кергтә мөңгиг балһсна һардвр һарһҗ өгв. Карантинд бәәсн бийнь багшнр болн нань чигн көдләчнр ирәд ширдлһнә-шалдлһна болн нань чигн көдлмш кев, бәәсн үүрмг дуту-дунд тиим кевәр уга кегдв. Ода сурһульд ЕГЭ-н немр шүүвр өгчәнә.
«Мана сурһулин сурһульчнр болхла, бас ЕГЭ шүүврән сән аштаһар өгв. Нег сурһульч обществознаня шүүвриг 99 баллд бичв. Тегәд алс-зәәһин эв-арһар сурсн бийнь мана сурһульчнр шүүвртән сәәнәр белдҗ чадв, – гиҗ келх кергтә. Теднә багшнрт, эк-эцкнрт ик ханлтан өргҗәнәв. Эн җил мана 11-ч классин сурһульчнрас 6 күн алтн медальтаһар сурһулян төгсәв. Ода мана сурһульд 980 күн сурчана. 11-ч хойр класст 40 күн сурһулин шин җилд орх. Сурһульчнран бидн тенкән угаһар һаха сарин нег шинд ирх гиҗ күләҗәнәвидн. Өрәл җилдән гилтә эдн сурһулян үзәд уга болҗана, ода шинәс иҗлдәд бәәх. Мартсн тоотынь багшнр түргәр дасхҗ өгх гиҗ бат ицгтә бәәнәв», – гиҗ Нәәмн Николаевна тоолвран келв.
Тер мет садмудт чигн бичкдүдин төлә зәәһин то икдүллһнә керг-үүлдвр дигтә-даратаһар күцәгдҗәнә. Елена Сергеевнан келсәр, цуг садмуд бүртклһиг давҗ һарв. Болв зәрм садмудт ораһинь шинрүллһнә, бат ясврин көдлмш бас кегдх.
Давсн җил Лаганя района Северн селәнә сурһульд, Октябрьск района Ик Царңга, Приютна района Воробьевск сурһульмудт, Көтчнрә района бичкдүдин лагерьт бат ясвр кегдлә, эн җил ДЮСШ-д ясвр төгсҗ йовна. Тиим кевәр цуг райодын сурһульмуд бүртклһнә керг-үүлдврт сәәнәр белдсн бәәнә. Ут-турштан таңһчар 320 һар сурһульмуд бүртклһнд орҗана, ноха сарин дундурар эн керг-үүлдвр төгсх йоста. Тер мет цааранднь Городовиковск балһснд кадетск корпусин 360 ормта немр гер, 520 ормта Троицк дундын сурһуль болн 275 ормта Баһ Дөрвдә сурһуль хамгин түрүнд тосхгдх зөвтә. Тер мет «Сурһуль-эрдм» гидг келн-уулсин төсвин кемҗәнд «Кванториум» гидг технопаркин төлә кергсл углҗ тәвгдх зөвтә, сурһульмудын спортзалмудт ясвр кегдх болн спортын площадкс тосхгдх. Эн объектәс зәрмнь эдлврт орулгдсн бәәнә. Тиим кевәр сурһулин болн спортын халхар белдлһнә таал җил ирвәс ясрад йовна.
Вирусин гем түглһн зогсагдхла, һаха сарин нег шинд миңһәд көвүд-күүкд сурһульмудтан ирҗ багшнрлаһан харһх. Эдн ода хувц-хунран, дегтр-девтрән хулдҗ авад тер байрта өдрт белдҗәнә.

Түрвән һуна

Видео