Нутг дундан тоомсрта

18-08-2020, 15:03 | Таңһчин зәңгс » Күн болн җирһл

Хар Һазра района Кумской селәнд бәәдг Санчра Раиса хөрн тавн җил хооран социальн көдләчәр экләд көдлв. Эн җилмүдин эргцд Раиса Коммуновна медәтә, гемтә-шалтгта болн һанцарн бәәдг нег һазра улст түрүн нөкд болн ицлтә түшг болҗ, кен негнднь һарлдсн эгчлә эс гиҗ үрнлә әдл болв. Делкә мини гисн седклтә, өр-өвч болн әмтнлә ээлтә, тевчңһү, седвәртә күүкд күн отг-әәмгтән күндтәд тоолгдна. Социальн көдләчәр көдлдг деерән эн селәнә бәәдл-җирһлд шунмһаһар орлцдг төләдән даңгин олна нүүрт йовна.
Эн хаврар селәнә муниципальн бүрдәцин толһач Саңһҗин Валентинан седвәрәр олн үртә, баһ тетквртә болн медәтә нег һазра улст буйнч седкләрн дөң күрглһнә керг-үүлдврмүд бүрдәгдв. Коронавирус гемәс сагллһна «Анолит» болн нань чигн эв-арһс, хот-хол эдн әмтнд гертнь күргҗ эн амр биш цагла дөң болв. Сән дурар үүлдсн улс дунд Санчра Раиса түрүн зергләнд бәәснь селәнә бәәрн улсиг өврүлсн уга. СМО-н толһач Саңһҗин Валентинан һардврт эдн кениг чигн оньгасн алдсн уга, хот-хоолар дөңнсн деерән гемәс саглҗ чик авг-бәрцәр бәәлһнә тускар әмтнлә күүндв.
Раиса Коммуновна өнр-өсклң өрк-бүлд төрҗ һарсмн. Эн ах-дүүһәрн йисн күн болна. Сиврин һазрт Алтайск крайин Троицк районд тууврт арвн һурвн җилдән бәәснә хөөн эднә өрк-бүл төрскн һазртан нүүҗ ирсмн. Эк-эцкнь дөрвн үртәһән нааран ирсмн, Раиса күүкнь хойр сарта билә. Тегәд эн Кумской селәнд өсәд-босад, төрскн һазртан йир эңкр болна. Келхд, йирн нас наслсн экнь Цаһан Нимкеевна энд отхн Борис көвүндән бәәнә. Экнь күүкдтән амн-нүдн болҗ бәәхнь эднд чидл-омг өгнә. Эк эцк хойрнь бичкнәснь авн күүкдтән герин көдлмш кедгиг, үүл бәрдгиг дасхсмн, тегәд йисн үрнь көдлмшч, шулун-шудрмг, арһта улс болҗ өсв. Өнр өрк-бүлд ахнрнь дүүнрән хәләҗ, эк-эцкдән нөкд болҗ, өөрән бәәх улст дөң күргҗ әмтнд цаһан седкләсн бәәсәрн хувалцх кергтә гиҗ сурһмҗ авсмн. Тер төләд Раиса Коммуновнад социальн көдләчәр көдлх үрвр кехлә, эн дарунь зөвән өгсмн.
– 1995 җилин моһа сарас авн би социальн көдләчәр көдлҗәнәв. Урднь би селәнд бичкдүдин садт, тосхлтын әңгд, хөд кирһлһнд көдлҗ йовлав. 90-ч җилмүдт социальн көдләчин җалв 40 арслң тогтадг билә. Болв җалв бичкн болв чигн нанд арһ уга улст дөң болҗ тусан күргхнь хамгин һоллгчнь болдг билә. Сүл хөрн тавн җилдән нег һазра улст дөңгән күргҗ, килмҗән тусхаҗ хәләҗәнәв. Эн көдлмш мини җирһлин һол керг болв. Эн җилмүдин туршарт хәләвртм һанцарн бәәдг медәтнр, эрмдгтә улс чигн бәәв, күн болһн нанд өөрхн улс болв. Эн халхар күч-көлснә хаалһан эклсн цагт мини хәләврт Валентина Дагаевна Гадышева тусв. Нидн эн сәәһән хәәв, тегәд энүнлә хамгин удан цагтан көдлүв. Ода мини хәләврт зурһан күн бәәнә. Эднәһүр ирхлә, медәтнр сүл зәңгәрн хувалцҗ, баһ цаган тодлҗ, ямр нег төрәр сүв-селвгән өгнә. Герин көдлмш кеҗ, хот-хоолынь болн эминь авч ирнәв, ода коронавирус гемәс саглҗ эргндк һазринь эд-бод кенәв. Мини хәләврт бәәдг улс наста эс гиҗ ямр нег гемтә улс болна, тегәд эднд килмҗ болн дөң кергтә болҗана. Эднд дөң күрглһиг би йирин көдлмшт тоолхшв, энтн мини бәәдл-җирһл, мини даавр болҗана, тер төләд мадн һарлдсн болн өөрхн улс кевтә ниитә бәәнәвидн, – гиҗ Раиса Коммуновна келнә.
Кумской селәнд олн келн-улс ни-негн, кен-негнәннь авъяс күндлҗ, ах-дүүнр кевтә бәәнә. Эдн байр-зовлңган әдл хувалцҗ, нег-негндән дөңгән күргҗ ямр нег төриг хамдан хаһлна. Эдн хальмг, орс, дагестан, чечен болн нань чигн келн-улсин сойл делгрүлҗ, хамдан байрин өдрмүдин нәр давулна. Селәнә сойлын Герт болдг байрин керг-үүлдврмүдт Санчра Раиса шунмһаһар орлцҗ, билг-эрдмәрн нег һазра улст бахмҗ болна. Экиннь үлгүрәр эн ду дуулхдан йир дурта, тегәд сойлын Герт үүлддг багин ханьд эн концертд орлцна. Күүкд күүнә келсәр «Һурвн альмн» энүнә хамгин дурта дун болна.
Дурта болн олнд туста көдлмш күцәҗәх Санчра Раиса хөвтә күүкд күн гиҗ келҗ болҗана. Анатолий Борисович авальтаһан эдн дөчн җилдән ниитә бәәҗ, дөрвн күүкндән чик сурһмҗ өгв. Эднә күүкднь өлзәтә сән үрд болҗ өссн болн эдн олн әмтн дунд тоомср олсн төләд Анатолий Борисовичиг болн Раиса Коммуновнаг «Дурна болн итклин» медаляр ачлсмн. Хамдан олн җилдән ниитә бәәдг Санчировихнә өрк-бүлиг Хар Һазра района һардвр Күндллһнә һашгар темдглсн билә. Һундл төрхд, нидн герин эзн гемин уршгар сәәһән хәәв. Күүкднь өсәд-босад эврә өрк-бүлтә болв, һурвн күүкнь Элстд, негнь Артезиан селәнд бәәнә. Йисн зень ээҗдән дару-дарунь гиичлҗ ирнә. Теднь ирх гиһәд ээҗнь һуйрин зүүтә кегдлмүд болһна, сенр болн шимтә хот белднә. Ээҗин болһсн бөөрг болн боорцг йир амтта болна гиҗ зеенрнь буульна.
Олн җилдән таңһчин социальн теткврин халхд үнн-чик седклтәһәр көдлҗ йовх күч-көлснә ветеран Санчра Раиса Әрәсән болн Хальмг Таңһчин социальн делгрлтин министерстин Күндллһнә һашгар ачлгдв. 2013 җилд энүнә тускар «Экин седкл» гидг шишлң һарцд статья барлгдсмн. Көдлмштән һавшун, седвәртә, ямаран чигн зовлңд даргддго, өр-өвч седклтә болн билгтә, олн дунд тоомсрта Раиса Коммуновна олнд үлгүр болн бахмҗ болна.

ДАВАН Наталья

Видео