Мана күүкд дәкнәс сән медрлән иткүлв

18-08-2020, 15:37 | Таңһчин зәңгс » Сурєуль-эрдм

Эн җил ЕГЭ өглһнә таал амр биш билә, түрүләд вирусин гем саалтг болв, дәкәд шүүврин болзгнь хооран саагдв. Тегәд сурһульчнрин медрлән сөрлһн әдл биш болад бәәв. Шүүврин даалһвр йир күнд болв, терүг шинәс өгх кергтә гиҗ зәрмснь некҗәв, наадкснь болхла ашнь му биш, нам күләгдснәс деер болв гиҗ келҗәв.
Эн җил 11-ч классан чиләсн 1465 төгсәһәч болн давсн җилмүдт сурһулян төгсәсн 314 күн ЕГЭ-н шүүвр өгв.
Шүүвр бүрдәхин төлә Элстин сурһульмудын ул деер 16 пункт секгдлә болн мөч тату арвтнрин төлә гер деернь 5 пункт тогтагдла.
Тер мет шүүвр бүрдәлһнд сурһуль-эрдмин бүрдәцсин 921 мергҗлтнр орлцв. Цааранднь болхла олна бүртклһиг 500 федеральн болн таңһчин олна организацин элчнр күцәҗәсмн. Эн җил деер келгдсәр түгдг вирусин гемәс көлтә кесг керг-үүлдвр күцәгдҗәсмн. Тиим кевәр иим нәрн таалд чигн таңһчд болн орн-нутгт эн чинртә шүүвриг дигтә-даратаһар давулҗ чадв гиҗ келх кергтә.
2020 җилд сурһульчнрт хамгин тааста болҗ орс келнә шүүвр йилһгдв. Энүг 1525 күн өгчәсмн. Цааранднь обществознань – 827 күн эн шүүвриг өгв. Эн саамд Приютна района Песчаный селәнә сурһулин күүкн 100 балл хоршаҗ авв. Йирдән эн предметәр 5 күн өөдән балл авв гиҗ келх кергтә, тернь сән белдврин болн багшнрин өөдән мергҗлтин темдгнь болҗахнь маһд уга.
Дәкәд хамгин олн тоота орлцачнрта шүүврнь математик болв, эн шүүвриг 670 күн бичв.
Тер мет 100 балл авсн арвтнрин тонь 43-д күрв. Тер тоод 1 күн утх-зокъялар, 2 - информатикәр, 24 күн – орс келәр, 7 күн - тууҗар, 4 күн – химияр 100 балл хоршав. Һурвн күүкн болхла ик күцәмҗд күрәд, хойр предметәр 100-һад балл авв. Тер тоод Ялмн Горяева (Элстин 17-ч тойгта СОШ), Энжира Васкеева (Хар Һазра района Комсомольск селәнә гимназь) болн Даяна Дюмкеева (Элстин олн профильтә гимназь) өөдән ашт күрв.
Әрәсәһәр ЕГЭ-н шүүвриг яһҗ өгснә тускар авад хәләй. Рособрнадзорин кесн то-дигәр шүүврин ашнь 2019 җилин ашла ирлцҗәнә эс гиҗ зәрм предметәр терүг нам давҗана.
Иигәд Әрәсәһәр тууҗар сурһульчнр ямаран ашт күрснә тускар хәләй. Ут турштан 102000 күн эн шүүвриг өгв. Дундын балл эн туст өсәд ода 56,4 тогтаҗана. Тер тоод 81-с авн 100 балл күртл өөдән үзмҗд күрсн сурһульчнрин тонь 4,5 % күртл өсв, 614 орлцач болхла 100 балл хоршав. Тиим кевәр тууҗан сәәнәр меддг арвтнрин тонь өсәд йовна, тернь сән, тиим олн күн тууҗиг шүүҗ авснь бас сән.
Болв ЕГЭ-н тууҗин шүүвриг өгч чадсн уга сурһульчнр орн-нутгар бас баһ биш, терүг бас нуулго келх кергтә. 7,5% энүнд орлцсн 102000 күүнәс кергтә балл авсн уга, тиим кевәр 7 миңһ һар арвт тууҗан медхш гисн ашлвр кеҗ болҗана. Эн сурһульчнр болхла вузд орхин төлә эн шүүвриг шүүҗ авсн болҗана, зуг шүүвртән эдн сәәнәр белдҗ чадсн уга эс гиҗ неквр тиим өөдән болх гиҗ санҗасн уга болҗана. Вузд орхар седҗәсн болхла улм сәәнәр белдх кергтә бәәсмн, алс-зәәһин сурһулин түрүн ашнь тиим болв гиҗ бас келҗ болҗана. Болв тууҗин шүүвр тиим күнд биш, тиигчкәд күн болһн тууҗан медх зөвтә гиҗ сангдна.
Тиим йир дора балл авсн сурһульчнрин то эн җил баһрв гиҗ Рособрнадзор келҗәнә. Болв эн сурһулин җилин туршарт ямаран чигн предметәр дундын медрл хоршаҗ болҗана гиҗ сангдна, тернь баһ гисн баллд күрх арһ өгх зөвтә, болв тиим йовдл баһ бишәр һарна гиҗ дамшлт үзүлҗәнә. Бүкл 11 җилдән күүкд сурһульдан ю кеһәд бәәсмб?
Физикин шүүвриг 139574 күн өгсмн. Давсн җил эн предметиг 3 миңһн күн өгчәсмн. Дундын балл 54,5 болсмн. Эн үзмҗ кесгтән сольгдҗахш гиҗ келҗ болҗана. Өөдән баллта көдлмшин тонь бас тер кевәрн үлдв (8,5%). 302 күн 100 балл хоршав!
5,7% арвтнр хамгин баһ балл чигн хоршаҗ авсн уга. 2019 җил тиим төгсәһәчнрин тонь 1% ик бәәсмн. Болв химийәр, физикәр болн биологийәр хоршасн сурһульчнрин медрл хамгин бичкн баллын тоод күрх арһ өгх зөвтә гиҗ сангдна.
Болв 100 баллта көдлмшин то өссн, түгдг гем болн алс-зәәһин сурлһн ЕГЭ-н ашт му үлмәһән эс күргсн йовдл арвтнриг, теднә багшнриг болн эк-эцкнриг байрлулв. Зуг сурһульчнрин медрлинь гүүдүллһнә тускар мартхмн биш.

ҖААХАН Бадм

Видео