Электронн эв-арһар туслмҗ күргв

24-08-2020, 15:43 | Таңһчин зәңгс » Эндрк ґдрин тґрір

Эн җилин эклцәс авн зурһан сарин туршарт Әрәсән ФСС-ин таңһчар үүлддг әңг Хальмгин улст 14380 шаңһа туслмҗ күргв гиҗ ведомствин барин цергллт зәңглҗәнә. Терүнәснь 8724 туслмҗ электронн эв-арһар күрггдсмн. Пандемий учрсн цагт дистанционн эв-арһар ямр нег төр хаһлҗ болхнь таңһчин әмтнд тааста болв. Электронн туслмҗ күрглһнә туск 8194 эрлһ социальн даатхлһна региональн әңгд орулгдв, наадк 530 эрлһ шаңһа туслмҗин сайтар дамҗулҗ өггдв.
Таңһчин предприять-бүрдәцс экономическ үүлдврән иткүлҗ тооцаһан электронн эв-арһар өгч эн туслмҗиг өргәр олзлҗахнь темдгтә. Эгл улс болхла реабилитацин техническ эв-арһсар, протезн-ортопедическ кегдлмүдәр, санаторн-курортн путевкар тетклһиг сурҗ эрлһән илгәнә. Тер мет көдлмштән шарх-шав авсн улс реабилитацин керг-үүлдврмүдт орлцсна төләдән эврә мөңгән һарһсн учрар терүг даңцахиг сурҗ электронн эв-арһар эрлһән бас орулна.
Әрәсән социальн даатхлһна саң ут тоодан 19 шаңһа туслмҗ күргнә. Эннь цаһан төр болсн күүкд улст болн нилхнь төрсн цаг зуур эс көдлсн цагт бас демин мөңг өглһн болн нань чигн туслмҗ болна.

БАТАН Наталья

Видео