Әрәсән ах сурһулин күндтә көдләч

24-08-2020, 15:55 | Таңһчин зәңгс » Күн болн җирһл

Хальмг университетин оютнр вузмудын хоорндк олимпиадмудт сән ашта үүлдвр күцәһәд, призермуд болн дииләчнр болна. Тернь шишлң сән белдврин, теднә багшнрин көдлмшин ашнь болҗана. Цуг факультетд тиим багшнр бәәнә. Эдн оютнрин билг-эрдминь, эсвәр, физикәр болн нань чигн предметәр авсн сән белдвринь йилһҗ авад, теднд онц оньган өгәд, оютнрин олимпиадмудын җисәнд орлцулна. Үлгүрнь, университетин эсвин хамцу команд орн-нутгин вузмуд дунд йилһән сән аш бәрнә.
Тер мет дундын профессиональн сурһулин факультетд тиим багшнр баһ биш. Эднә тоод педагогическ күч-көлснә ветеран, педагогическ номин кандидат, доцент Рита Бадминовна Басангова йовна – ик дамшлтта багш болн эсв, цаһан седклтә күн. Дундын профессиональн сурһулин факультет университетд одахн гилтә бүрдәгдлә, тегәд энд икнкдән баһ наста, дөч күрәд уга мергҗлтнр болн номтнр көдлнә. Эн баһ наста, седвәртә болн шунлтта көдләчнр дунд чигн Рита Бадминовна үүдәгч хәләцәрн, көдлмшин болн сурһмҗ өгдг эв-арһарн йилһрнә.
– Хамгин түрүнд билгтә оютнриг хәәх кергтә. Теднә билг-эрдминь цааранднь делгрүлхмн, тиигхлә эдн йоста мергҗлтнр болн багшнр болҗ өсх. Тиигчкәд нег чигн күн багшин оньгас алдрх зөв уга, яһад гихлә күн болһн эврәннь билгтә, терүг илдкәд, цааранднь өргҗүлх күн багш болҗана, – гиҗ Рита Бадминовна келнә.
Рита Бадминовнан орлцлһтаһар кесг җил хооран Ах сурһульд педагогическ отрядмудын болн вожатнрин җисән делгрлт авла. Ода цуг Әрәсәһәс вожатнр Элстд ирәд дамшлт авна, энд орн-нутгин төлә ик чинр зүүҗәх керг-үүлдврән кенә, Рита Бадминовна тер кемд педагогическ факультетиг толһалҗала.
Номт болн билгтә мергҗлт Р.Б.Басангова университетиг бүрдәҗәсн багшнрин негнь, эдн һоллгч хальмг вузин авъясинь тогтаҗала, цуг арһ-чидлән болн билг-эрдмән Хальмг Таңһчин баһчудыг сурһлһнд болн сурһмҗллһнд өгчәсмн.
Дөчн тавн һар җилдән Рита Бадминовна Хальмг университетд көдлҗәнә, түрүләд физико-эсвин, дәкәд педагогическ, аш сүүлднь дундын профессиональн сурһуль-эрдмин факультетд оютнрт гүн болн дигтә медрл заана.
Хальмг университетин ветеран болсн деерән доцент Р. Б. Басангова эврә эрдмин халхар тасрхан угаһар өслтин болн делгрлтин цуг кемиг давҗ һарсмн: эсвин багшас экләд, кафедрин һардач болн педагогическ факультетин декан болв.
Эндр Рита Бадминовна Басангова — күндтә педагог, энүнә цуцрлтан уга үүдәгч көдлмшиг кесг ачлврар үнлсмн, тер тоод Хальмг Таңһчин ачта багш, Әрәсән ах сурһулин күндтә көдләч болн нань чигн кесг ачлврар эн номт ачлгдла. Академик Эрдниевин үр болн нег халхар көдлҗәсн номт болсн деерән Рита Бадминовна УДЕ-н шин методикин ул-сүүринь бүрдәлһнд орлцҗасмн.

ҖААХАН һуна

Видео