Таңһчин багшнрин селвлцән болв

25-08-2020, 16:55 | Таңһчин зәңгс » Сурєуль-эрдм

Ноха сарин 20-д Элстд онлайн видеоконференцин диг-дараһар Хальмг Таңһчин багшнрин августовск селвлцән болв. Сурһуль-эрдмин чинринь өөдлүллһнә шин эв-арһин болн иргчин туск төрәр энд күүндвр болв. Селвлцәнә көдлмшт сурһуль-эрдмин муниципальн органмудын, бүрдәцсин һардачнр, багшнр, эк-эцкнрин олна элчнр, «Гегән-герл» («Просвещение») дегтр һарһачин мергҗлтнр, таңһчин сурһуль-эрдмин болн номин министерствин, КРИПКРО-н көдләчнр, соньмсҗах бүрдәцсин элчнр орлцв.
Таңһчин сурһуль-эрдмин системин көдләчнр олнд туста сән көдлмш күцәв гиҗ эднә үүлдвриг селвлцәнд орлцачнр үнләд, иргч 2020-2021-ч сурһулин җилд хамгин түрүнд күцәх даалһвриг йилһҗ авв. Тер тоод эн керг-төриг һарддг министерств «Сурһуль-эрдм» гидг келн-улсин төсвин керг-үүлдвриг цааранднь күцәх зөвтә, тер мет «2025 җил күртл Әрәсән Федерацд сурһмҗин делгрлтин стратегий» күцәлһнә керг-үүлдврин ут тоог цааранднь элвҗүлх зөвтә.
Эндр өдр сурһуль-эрдмин чинринь өөдлүллһнд һол оньг өгчәнә, зуг тиим кевәр сурһульчнрин медрлинь гүүдүлҗ теднә белдвринь өөдлүлҗ болҗана гиҗ селвлцәнд орлцачнр келсн үгдән темдглв. Тиим кергиг күцәхин төлә ода олн кемҗәтә модель бәәнә, терүг цааранднь ясрулх даалһвр министерствин мергҗлтнрт өггдв.
Райодын болн Элст балһсна сурһуль-эрдмин органмуд бас тиим керг күцәлһнд һол оньган өгх зөвтә гиҗ селвлцәнд орлцачнр ашлгч иткл цаасд заав. Онц керг-үүлдврин диг-дараг эдн үүдәхмн.
Сурһмҗин стратегий күцәлһнд эдн бас һол оньган өгхмн. Б.Б.Городовиковин нертә Хальмг госуниверситетлә, багшнрин мергҗлт өөдлүллһнә институтла (КРИПКРО) хамдан багшнрин мергҗлтнрин көрң тогталһар үүлдвр күцәхмн, эднә мергҗлт өөдлүллһнд оньган өгхмн.
Шүүвр өглһнд му үзмҗ бәрсн сурһульмудт методикин халхар дөң күрглһнә, келн-улсин төсвиг күцәлһнд орлцҗах бүрдәцст цааранднь селвгән өгч нилчән күргхмн гиҗ селвлцәнд орлцачнр тоолҗана, көдлмшиг улм тодрхаһар КРИПКРО күцәх зөвтә. Эн саамд алс-зәәһин эв-арһиг өргәр олзлх болхмн.
Сурһулин болн колледжмүдин һардвр баһ наста багшнрт дөңгән күргәд бәәх зөвтә. Бичкдүдин болн арвтнрин сурһмҗд һол оньган өгәд бәәхмн гиҗ ноха сарин хургт орлцачнр тоолвран медүлв.
Колледжмүд «Баһ наста профессионалмуд» гидг әрәсән җисәнд ик күцәмҗ бәрҗ орлцҗана, өдгә цагин көдлмшч эрдмтә улсиг белдлһнә орн-нутгин җисәнә некврлә ирлцәтәһәр материальн-техническ улыг батрулхмн. Сурһулин көтлврәр эрдмин стандартла ирлцүлҗ шинрүлгдхмн.
Севлцәнә йовудт илдклмүд кегдв, багшнр болн мергҗлтнр күцәсн көдлмшин, алс-зәәһин эв-арһ олзллһна дамшлтын тускар тодрхаһар келҗ өгв. Тер мет «Гегән-герл» дегтр һарһачин элчнр ямаран шин даслурмуд һарһгдхин, сурһулин болн сурһульчнрин, эк-эцкнрин неквр яһҗ күцәгдхин тускар тодрхаһар келҗ өгч, багшнрин сурврт тодрха хәрү өгв.
Тиим кевәр ноха сарин хургт авсн җилин ашиг диглх арһ өгв, хоршасн дамшлтыг улм өргәр олзлх селвгән хургт орлцачнр өгв. Сурһулин җил күнд бәәсн болв чигн арвтнр шүүврән сән аштаһар өгч чадв, нам йирин җилмүдт тиим күцәмҗ сурһульчнр бәрәд уга. Һаха сарас авн бичкдүд болн арвтнр дәкнәс сурһульд орх, эрүл-мендин халхар тогтсн нәрн бәәдлин таалд хоршасн дамшлт улм ик чинр зүүһәд бәәхнь лавта.

ҖААХАН Һуна

Видео