Сертификатыг – күүкдиннь сурһульд

25-08-2020, 16:58 | Таңһчин зәңгс » Эндрк ґдрин тґрір

Күүкд-көвүд сурһулян төгсәһәд, тааста эрдм шүүҗ авад, деед сурһульд сурхар шунҗана. Дигтә ода абитуриентнриг оютнрин тоод орулҗ авлһна дааврта кем болҗана. Әрәсән пенсионн саңгин Хальмг Таңһчар үүлддг региональн әңгин барин цергллтин зәңглсәр, зәрм эк-эцкнр өрк-бүлин сертификатын мөңгиг күүкдиннь сурһульд олзллһна туст цәәлһвр өгхиг сурна. Келхд, сертификатын мөңгиг гер-бүүрин таал ясруллһнд, күүкдиннь сурһульд болн экин пенсь тогталһнд олзлҗ болхмн. Мана таңһчд нурһлҗ терүг гер-бүүрин таал ясруллһнд олзлна. Болв күүкдиннь сурһульд чигн терүг олзлх саната улс бәәнә. Тиигәд, эн җил 32 күн сертификатыг күүкднь деед сурһульд сурхд олзлхиг сурв.
ПФР-ин региональн әңгин социальн демин мөңг өглһнә багин мергҗлтнрин келсәр, сертификатыг Әрәсән сурһуль-эрдмин бүрдәцд сурхин төлә олзлҗ болхмн. Болв үрнь 25 наснас ах болшго зөвтә гисн неквр бәәнә. Экин сертификатын эзн сурһуль-эрдмин бүрдәцлә үрнь мөңгән өгч сурхин тускар батлсн бооцана харинь ПФР-ин заллтд орулҗ өгх зөвтә. Бас тер мет сертификатын мөңгиг общежитьд бәәсн төләдән олзлҗ болхмн. Терүнә төлә общежитьд хора нәәмәдлҗ авлһна туск бооца батлх, эн общежитьд бәәдгиг герчлҗәх иткл цаас сурчах һазрасн авх кергтә.
Деед сурһульд сурхин төлә экин сертификатын мөңгин зәрм хүвинь олзлҗ болхмн. Үлдсн наадк мөңгинь болхла талдан кергт олзлҗ болҗана, үлгүрнь, гер-бүүрин таал ясруллһнд. Сүл кесн то-дигәр мана таңһчд 23 миңһн күн экин сертификатын эзн болна.

БАТАН Наталья

Видео