Тосхлтын көдлмш төгсҗәнә

28-08-2020, 16:46 | Таңһчин зәңгс » Эндрк ґдрин тґрір

Шидр Хальмг Таңһчин тосхлтын, көлгн-күчнә болн хаалһин эдл-ахун министр Җанҗин Виктор болн энүнә дарук Ченкалин Евгений «Элст-Арзгир –Минеральные Воды» региональн хаалһд кегдҗәх ясврин көдлмш бүрткҗ хәләв. Энд «Әәмшг уга болн сән чинртә хаалһс» гидг келн-улсин төсвәр ясврин көдлмш кегдҗәнә.
Ода деерән «РостовАвтоДор» гидг бүрдәцин көдләчнр хату девскртә хаалһ тосхв, усн гүүдг ташу һазр цеврлҗәнә. Эн хаалһин участкд «Агронива» ниицәнә көдләчнр бас көдлҗәнә. Эдн 3 километрт шин эв-арһ олзлҗ хату девскр кев, тегәд хөөннь энд удан цагтан ясвр керглгдшго.
Бүртклһнә керг-үүлдврин йовудт дааврта һардачнр Ик Буурла района муниципальн бүрдәцин толһачин дарук Александр Владимировла Орһахн болн Магна селәд тал тосхгдҗах хаалһс йовҗ хәләв. Орһахн селән күртл хату девскртә хаалһ бүклдән шинрүлгдв, хаалһин хаҗуд сән таал тогтагдв. Удл уга энд хаалһин темдгүд углҗ тәвгдхмн. Магна селән күртл тосхлтын көдлмш бас төгсв. Александр Владимировин келсәр, селәнә бәәрн улсин сурврар нег уульнцд 220 метрт тротуар тосхгдхмн. Келн-улсин төсв бәәдл-җирһлд тохрагдҗахас иштә Магна селән күртл ода хату девскртә хаалһар җилин дөрвн цагт күрч болхмн. Бүртклһнә керг-үүлдврин ашар тосхлтын бүрдәцст көдлмшән шунмһадулҗ объектсиг эдлврт орулх кергтә гисн даалһвр өггдв.

БАТАН Наталья

Видео