Ашлгч орулҗ авлһн төгсв

28-08-2020, 16:50 | Таңһчин зәңгс » Сурєуль-эрдм

Одахн Хальмг ик сурһульд шин оютнриг орулҗ авлһна комиссин дарани сүүр болв. Эн саамд 494 күн бакалавриатд орулгдв. Авъяст тохрсар шин селгә орулҗ авлһна болзгнь һурвн девсңгәр хувагдсн бәәнә. Тер тоод ноха сарин 22-т онц хәләврәр (квотар) орулҗ авлһн болв, ноха сарин 24-д цуг шин оютнрин ик зунь (80%) орулгдв, терүнә тускар бидн ода келҗәнәвидн.
Аш сүүлднь, ноха сарин 26-д, төгсәгч девсң болв, тер девсңгин тускар бидн бас цааранднь тодрхаһар келнәвидн, эн өдр ик сурһульд орулгдсн цуг арвтнрин нердинь олнд медүлгдв. Эдн цугтан аштнь һаха сарин нег шинд ик сурһульд ирәд, кичәлдән орх.
– Сурһулин цуг кев-янзар сурхин төлә шаңһа һарһҗ өгсн (бюджетин) 1205 ормд орхин кергт 5700 эрлһн ирв, тер йовдл байрлулҗана. Юңгад гихлә, дундлад 1 орм эзлхин төлә нам 5 күн дөрлдв, – гиҗ Хальмг ик сурһулин ректор Салан Бадм тоолвран келв. – Эн шин селгә орулҗ авлһна кампаня йовудт мана бүрдәцин көдләчнр пандемийин амр биш таалд ик көдлмш күцәв. Терүнә төлә би цуг багшнрт, дааврта көдләчнрт, оютнрт ик ханлтан өргҗәнәв. Мана Хальмг ИС-д, түшгч таңһчин (опорный региональный) ик сурһульд иткәд, нааран сурхар ирсн баһчудт болн теднә эк-эцкнрт бас ик ханлтын үгән келҗәнәв, – гиҗ ректор товчлв.
Ода ик сурһулин багшнр болн оютнр шин селгә орулҗ авлһна кампаниг төгсәһәд, сурһулин шин җилдән белдҗ, һаха сарин нег шинд болх Медрлин өдрән сәәнәр тосхин төлә бас хамцу ик үүлдвр күцәҗәнә.
Эн җил оютнр хамгин түрүнд хууль-закана, һазадын орна келн, нарт делкән хәрлцән, зәңгллһнә әәмшг уга бәәдл (информационная безопасность) болн тосхлт гидг эрдм шүүҗ авв. Энд нег орм эзлхин төлә 3-с үлү күн дөрлдҗәсмн. Ик то балл ЕГЭ-һәр Элстин 17-ч тойгта СОШ-ин төгсәһәч Екатерина Калюжная хоршав, тегәд дегц тавн вузд орх зөв эн авв, тер тоод Москван 4 вузд, болв күүкн Хальмг ик сурһульд орхар шиидв, «востоковедень» гидг эрдмиг эн шүүҗ авв.
СПО-н (дундын профессиональн сурһуль-эрдмин) тиңкмд сурһульчнр дунд ик тоомср бас эзлҗәнә. Хальмг ИС-д орхар седҗәсн кемд өөдән ик балл хоршасн негдгч курсин оютнриг вузин һардвр стипендинь икдүлҗ, немр мөңг өгч урмдулх.
Тер мет Элстин лицей төгсәһәч Аюш Чи-жо-одо өөдән балл хоршасна хөөн Хальмг ИС шүүҗ авв. Пандемийәс әәһәд тиигҗ шиидсн болх, гиҗ зәрмснь келх, болв эн түгҗәх гем артвнрин болн теднә эк-эцкнрин зураст чиклвр орулсн бийнь, эдн Хальмг ИС гүн, сән медрл өгнә гиҗ бат ицгтә бәәнә. Аюшин эцкнь келсәр, эврәннь вуздан чигн сән сурһуль авч болҗана, энд таал талдан вузас дор биш, нам зәрм халхар теднәс деер.
Удл уга ик сурһульд орсн оютнрин нерд Хальмг ИС-н сайтд барлгдх. Хальмг ик сурһульд сурхар седҗәх баһчудын тоод Әрәсән 19 региона болн һазадын 14 орна элчнр йовна.
Деер келгдсәр шин селгә орулҗ авлһна ашлгч девсңнь ноха сарин 26-д болв. Эн саамд бас 113 күн, тер тоод магистрантнр болн аспирантнр, Хальмг ик сурһульд орв.

ҖААХАН Бадм

Видео