Гер-бүүрин таал ясрулна

31-08-2020, 15:46 | Таңһчин зәңгс » Эндрк ґдрин тґрір

Эн җилин эклцәс авн мана таңһчд 635 өрк-бүл экин сертификатын мөңгиг ямр нег төр хаһллһнд олзлв гиҗ ПФР-ин Хальмг Таңһчар үүлддг региональн заллтын барин цергллт зәңглҗәнә. Теднәснь 74 процентнь гер-бүүрин таал ясруллһнд терүг олзлв. Ут тоодан 469 өрк-бүл эн җил сертификатын мөңг олзлҗ, шин бүүртә болв.
Эн җил сертификатын мөңгиг олзлсн 147 өрк-бүл хойрдгч үрндән сар болһн демин мөңг авхар седв. Эн җил демин мөңгнә кемҗән 10211 арслң тогтав. Зурһан зу һар өрк-бүләс зуг 3 процентнь күүкдиннь сурһульд экин сертификат олзлв.
Пенсионн саңгин Хальмг Таңһчар үүлддг заллтын социальн дем өглһнә әңгин мергҗлтнрин келсәр, экин сертификат «Демографь» гидг келн-улсин төсвин медлд Әрәсән өрк-бүлмүдт шаңһа дөң күрглһнә халхар өггдҗәнә. 2007-ч җиләс авн экин сертификатыг авх зөв хойрдгч үрнь төрҗ һарсн эс гиҗ терүг көвүчлҗ авсн өрк-бүлмүдт бәәнә. 2020-ч җиләс авн түрүн үрнь төрҗ һарсн өрк-бүлмүдт бас тиим зөв өггдв. Эн җилин туула сарин 1-с авн түрүн үрнь төрҗ һарсн өрк-бүлд өггдҗәх сертификатын кемҗән 466617 арслң тогтана. Эн кемд хойрдгч үрнь төрҗ һарсн улсин сертификатд 150 миңһн арслң немгднә.
2020-ч җилин мөрн сарин 15-с авн экин сертификатыг эрлһ угаһар дарунь йилһҗ өгнә. ПФР-ин эс гиҗ шаңһа туслмҗин сайтд иргнә онц кабинетд өрк-бүлд экин сертификат йилһгдснә туск зәңг ирнә. Хальмг Таңһчд 2007-ч җиләс авн 23 миңһ һар сертификат йилһҗ өггдв. Экин сертификатын көтлвр мана орн-нутгт 2026-ч җил күртл күцәгдхмн.

БАТАН Сәәхлә

Видео