Хальдврта гемәс саглхин төлә

31-08-2020, 15:49 | Таңһчин зәңгс » Эндрк ґдрин тґрір

Хальмг Таңһчин правительствин Ахлачин дарук Ирина Шварцман селекторн залһлдана эв-арһар райодын толһачнрла селвлцә давулв. Терүнд таңһчин сурһулин бүрдәцсиг хальдврта гемәс саглуллһна эв-арһсар тетклһнә болн эклц классмудын сурһульчнрт халун хот өглһнә төр хаһллһна тускар өргн күүндвр болв. Сурһулин җилин өмн өргнд босхгдсн төрмүд эркн чинртә болҗахас иштә терүг ахр цагин болзгт хаһлх кергтә гиҗ селвлцәнд темдглгдв.
Сурһулин бүрдәцсиг гемәс саглуллһна эв-арһсар тетклһнә төр ода деерән нәрн болҗана, болв таңһчин һардвр терүг хаһлх арһ хәәҗәнә. Эн кергт немр мөңгн кергтә болҗана. Дәкәд орн-нутгин регионмуд цуһар гилтә эн эв-арһс кеҗ-һарһдг үүлдврмүдт эрлһс орулснас иштә терүгәр тетклһнә туст чеерүд тогтсн бәәнә. Болв тер бийнь эн туст көдлмшән шунмһадулх кергтә гиҗ вице-премьер Ирина Шварцман райодын муниципальн бүрдәцсин толһачнрт неквр тәвв. Шидр таңһч райодын сурһуль-эрдмин бүрдәцсин төлә рециркулятормуд йилһҗ өгсн билә, удл уга немр 200 кегдл бас ирхмн. Тедниг бас райодын сурһульмуд дунд түгәҗ өгхмн. Бас тер мет хотл балһсна сурһуль-эрдмин бүрдәцсин төлә 884 кегдл йилһгдв, теднәснь 542 рециркулятор сурһульмудт өгхмн, наадкснь болхла бичкдүдин садмудт йилһгдх.
Ода райодын һардачнр бәәр эд-бод кедг эв-арһс кеҗ-һарһдг үүлдврмүдт орулсн эрлһәр эднд кергтә кегдлмүд авч ирхиг күләҗәнә. Болв тер бийнь иим эв-арһс дәкәд керглгдҗәнә. Зәрм райодт эн кергт мөңгн уга болҗахнь нуувч биш. Тегәд эн төриг района болн таңһчин һардвр хамцу хаһлх арһ хәәҗәнә. Селәдин сурһульмудт бичкдүд хойр селгәһәр цаг зуур сурх чигн гиҗ селвлцәнд келгдв. Бәәриг эд-бод кедг эв-арһсар бүклдән теткҗ, сән таал тогтатл эдн тиим кевәр сурхмн.
Эклц классмудын сурһульчнриг халун хотар тетклһнә төр райодын болн хотл балһсна сурһуль-эрдмин бүрдәцст му бишәр хаһлгдҗана гиҗ селвлцәнд орлцачнр темдглв. Эн керг бүрдәлһнә туст бооцан батлгдв, мөңгн йилһгдв, тегәд эклц классмудын сурһульчнр цугтан халун хотар теткгдхмн. Эклц классмудт сурһульчнрин то ик болҗах балһсна сурһуль-эрдмин бүрдәцст кичәлмүдин болн завсрин диг-даран диглгдҗәнә. Эннь хальдврта гемәс хөрлһнә төлә күцәгдҗәх санитарн керг-үүлдврмүд бүрдәлһнә неквр болҗана.

ДООҖАН Наталья

Видео