ӘМТӘХН ТАРВС БЕЛГЛВ

31-08-2020, 15:53 | Таңһчин зәңгс » Эндрк ґдрин тґрір

Шидр Хар Һазра района муниципальн бүрдәцин администрацин һардврин шиидврәр нег һазра улст хойр тонн тарвс түгәҗ өггдв. Әәдрхн болн Кизляр хоорнд төмр хаалһ тосхсн улс, күч-көлснә фронтын орлцачнр, Төрскән харсгч Алдр дәәнә ветеранмудын белвсн күүкд улст, насни дигт күрәд уга насндан немшнрин бәрәнд бәәсн болн гемтә-шалтгта улст әмтәхн зер-земш гертнь күрггдв. Района сән дурар үүлддг баһчуд эн кергт орлцҗ, медәтнрт тарвс күргҗ өглһнд дөңгән күргв.
Ноха сарин 25-26-д нәәмн селәдин муниципальн бүрдәцд бәәдг медәтнрт буйнч седклин кергин йовудт тарвс йилһҗ өггдв. Района фермермүд урһасн тарвс амсҗ, эднд иим әмтәхн белг авч ирснд медәтнр ханлтан өргв.
Келхд, Хар Һазра районд иим буйнч седклин керг дару-дарунь бүрдәгдҗ, баһ тетквртә улст болн медәтнрт дөң күрггднә. Нег үлү пандемий болсн кемд района һардвр болн селәдин муниципальн бүрдәцсин толһачнр әмдрлин күнд таалд туссн улсиг оньгасн алдҗахш. Одахн, Комсомольский селәнд өсәд-боссн Эрднь-Һәрән Виктор олн үртә, баһ тетквртә, әмдрлин күнд таалд туссн болн һанцарн бәәдг медәтнрт тарвс белглһнә буйнч седклин кергин эк татв. Эн бийнь өнр-өсклң өрк-бүлд өссмн, эдн ах-дүүһәрн нәәмн күн болна. Тегәд бичкнәсн авн эн олн үртә өрк-бүлд күнд болдгиг сәәнәр меднә. Эврәннь седвәрин тускар эн бәәрн арһлач Маштка Григорийла хувалцв. Григорий Лиджи-Горяевич мана таңһчин әмтн дунд ик тааслт олсн Сарульск тарвс урһана. Фермер баахн залу күүнә седвәриг дөңнәд, һурвн тонн тарвс йилһҗ өгв.
Эн буйнч седклин кергт Хар Һазра района муниципальн бүрдәцин һардвр бас орлцҗ, тарвсиг һарудас авч ирхин төлә тосн-түләнә мөңгинь даав. Бәәрн арһлач Ивана Валентина болхла көлгн-күч йилһҗ өгв. Сән дурар үүлддг шунлтта селәнә баһчуд бас эн кергт шунмһаһар орлцв. Эдн әмтнд гертнь тарвс күргҗ өглһнд дөңгән күргв. Тиигәд олна дөң-тусар Комсомольский селәнд бәәдг олн үртә, баһ тетквртә өрк-бүлмүд, медәтнр әмтәхн тарвсар тоогдв.
Эрднь-Һәрән Викторин келсәр, зуни сармуд төгсҗ йовна, тегәд бичкдүд болн медәтнр дурта земш амстха гиһәд эн керг бүтәгдсмн. Зәрм улст тарвс хулдҗ авх арһ уга болна, тегәд буйнч седклтә улсин дөңгәр эдн терүг идәд ханв. Зуни әмтәхн зер-земш цугтаднь әмтәхн белг болҗ ик байр үүдәв. Эдн цуһар эн керг күцәсн улст ханлтан өргҗ, өглһнә эздүд болтн гиҗ йөрәв.

ДАВАН Наталья
ЗУРГТ: Комсомольский селәнә әмтнд тарвс авч ирсн кем

Видео