Медрлин өдр өлзәтә болтха!

31-08-2020, 16:07 | Таңһчин зәңгс » Сурєуль-эрдм

Җил болһн һаха сарин нег шинд мана орн-нутгт Медрлин өдр темдглнә. Эн кемлә цуг сурһульмудт, колледжмүдт болн вузмудт сурһулин җил эклнә. Медрлин өдр – цуг сурһульчнрин болн оютнрин, эднә эк-эцкнрин болн багшнрин, эдниг теткдг цуг улсин төлә йоста байр-бахмҗ болна.
Болв эн җил тарҗах гемәс көлтә сурһульмудт авъяст тохрсн линейк зуг 1-ч болн 11-ч классмудын сурһульчнрин төлә болх, түгдг гемәс сагллһна нань чигн керг-үүлдвр дарук өдрмүдт кичәлин өмн күцәгдх. Эклц классин бичкдүдиг халун хотар байрин өдрәс авн теткх, кесг регионмудын төлә, тер тоод Хальмг Таңһчд федеральн шаңһас эн кергт мөңгн йилһҗ өггдв.
Йирдән зәрм райодт фермермүдин дөңгәр эн керг сән аштаһар күцәгдҗәлә, цуг күүкд халун хотар теткгдҗәлә, ода мөңгн өггдснә хөөн эн ик чинртә керг улм сәәнәр күцәгдәд бәәх гиҗ нәәлҗ болҗана.
Эн җил болсн ЕГЭ-н шүүвриг хальмг сурһульчнр кесг цагтан алс-зәәһин таалд дасҗасн бийнь сән аштаһар өгч чадв, кесг арвтнр 100 балл авв. Зәрмнь нам кесг предметәр тиим өөдән ашт күрв, эн тоод Элстин болн райодын сурһулин элчнр йовна. Тиим күцәмҗд эднә багшнр ик тәвцән орулснь лавта. Медрлин байрин өдрлә бидн бас нег дәкҗ эн җилин төгсәһәчнриг болн эднә эк-эцкнриг йөрәҗәнәвидн, эдн Хальмг ик сурһулин болн нань чигн вузмудын оютнр болснь лавта.
Мана сурһульмудт дамшлтта, медрлтә олн зүсн шин эв-арһ үүдәгч кевәр олзлдг багшнр бәәнә, эднә сурһульчнр таңһчин болн орн-нутгин олимпидмудт орлцна, йилһән сән темдг авна, багшнр сурһмҗин ик көдлмш күцәнә, холас сурлһна баһ биш дамшлтыг эдн вируста гем ирсн цагла хоршав, эднд эк-эцкнр ханлтан өргҗәнә, Медрлин өдрлә йөрәҗәнә. Кемр пандемийин туст бәәдл муурхла, хәрү алс-зәәһин системд орх кергтә болх. Тиим системиг Әрәсән гегән герлин министерств белдсн бәәнә. Герин көдлмшән көвүд-күүкд эн эв-арһиг олзлҗ күцәһәд бәәх.
Вузмудын оютнр һаха сарин нег шинд бас ик сурһульдан ирҗ сурһулян эклх, болв вирусин гем түглһнә әәмшг бәәхлә вузин һардвр алс-зәәһин даслһна туск шиидвр авч чадҗана. Хальмг ик сурһуль эн өдр бас кесг факультетин оютнран күләҗәнә, эн җилин шин селгә оруллһна керг-үүлдврән сән аштаһар күцәсндән вузин баг ик байрта-бахта бәәнә. Тиим ончта күцәмҗлә бидн ик сурһуль багшнриг болн оютнриг йөрәҗәнәвидн.
Ода һаха сарин нег шинд бидн орн-нутгин сән өдр – Медрлин өдр темдглнәвидн. Энүг Советск Союзд 1984 җиләс авн темдглдг болв. Урднь болхла энтн йирин өдр бәәсмн, байрин линейкин хөөн цугтан авъяст тохрсар кичәлдән ордг бәәсмн. Эн өдр бидн цугтан түрүн хоңхан, түрүн багшан тодлнавидн, хамдан нег класст сурчасн үүрмүдән тодлнавидн.
Һаха сарин дундурар эс гиҗ хулһн сард көгҗмин, зурачнрин, спортын сурһульмуд болн немр сурһулин нань чигн бүрдәцс көдлдг болх гиҗ бидн күләҗәнәвидн. Энд сурһульчнр үүдәгч кевәр көдлдгиг дасна, эрүл-мендән батрулна, тер сурһульмудтан сурһульчнр бас теңкән угаһар немр эрдмән цааранднь дасхар бәәнә, болв карантинә таал тиим арһ өгчәхш. Түрүләд йирин сурһульд орулсн шин диг-даранла бичкдүд иҗлдх зөвтә, дәкәд карантинә таал ясрхла, немр сурһулин бүрдәцд орҗ болҗана.
Байрин өдрин өмн өргнд Элстд болн райодт, бичкн селәдт шин сурһульмуд, садмуд тосхгдв, теднә капитальн ясвр кегдв, спортзалмуд шинрүлгдв, тиим таалд медрл авхд йир сән. Тиигчкәд эн җилин чилгч күртл эс гиҗ дарук җилд шин сурһульмуд Элстд, Троицкд, Баһ Дөрвдт болн нань чигн селән-балһснд эдлврт орулгдх, тиигхлә күүкдин болн теднә багшнрин, эднә эк-эцкнрин байр улм ик болх. Тиим тосхлтс улм икәр дуусгдад бәәтхә гиҗ бидн Медрлин өдрлә йөрәҗ, сурһульчнрт болн цуг улст дурдҗанавидн, тосхачнр болхла көдлмшән улм сән чинртәһәр күцәһәд бәәтхә.

ТҮРВӘН Һуна

Видео