Моңһлын багшнр эрүл-мендән бүрткх

01-09-2020, 15:05 | Таңһчин зәңгс » Сурєуль-эрдм

Сурһулин шин җил эклтл Моңһл орн-нутгин багшнр делкәһәр түгҗәх гемәс көлтә бас эрүл-мендән шинҗлҗ пандемийәс саглхин төлә эмчин бүрдәцд хәләврт орх.Тиим зәңгиг орн-нутгин сурһуль-эрдмин болн номин министерствд медүлв. Тер бачм шинҗллт шаңһа мөңгәр күцәгдх гиҗ заагдв.
«Моңһлын залврт вируста гемәс сагллһна керг-үүлдврт һол оньг өггдҗәнә. Тегәд залврин вице-премьер, финансин министр, күч-көлснә болн социальн харслтын министр олн сурһуль-эрдмин болн номин министр сурһулин шин җилд белдлһнә керг-үүлдвриг эврән һардҗана. Иигәд, сурһуль-эрдмин болн номин министр сурһулин йовциг (процессиг) бүрдәлһнә цаг зуурин диг-дараг батлв.
Энүнлә ирлцәтәһәр багшнр шишлң курст давҗ һарад, сагллһна керг-үүлдврин таалд яһҗ көдлхин туск селвг авв. Деер келгдсәр, цуг багшнр эрк биш эмчин хәләврт орх зөвтә» – гиҗ Моңһлын сурһуль-эрдмин болн номин министерствин барин цергллт зәңглв.
Урднь олнд зәңглсәр, сурһульмудт болн садмудт сурһулин шин җил һаха сарин нег шинд эклв. Тиим шиидвриг Орн-нутгин үлү зөвтә комиссь батлсмн. Вузмудт болн колледжмүдт кичәлмүд хулһн сарин 5-с авн эклх.
Коронавирус бичә түгтхә гиһәд райодын болн селәдин сурһульмуд йирин диг-дараһар көдлх. Хотл Улан-Баатр балһснд болн әәмгүдин төвин цутхлңгин сурһулин заведеньст тер диг-даран невчк хасгдх, күүкд долан хонгин һурвн өдртән класстан сурх, наадк хойр өдртән холас номан дасх.
Моңһлын йосна органмуд пандемийәс көлтә 2020-ч җилин туула сарин 30-с авн белн бәәлһнә диг-дара орулв, тиигхд сурһуль-эрдмин цуг бүрдәцс хаагдла. Лу сарас авн мөчн сар күртл холас даслһн бүрдәгдлә, сурһульчнр гертән медрлән авчала.
Ода Моңһлд карантин цааранднь болад бәәнә, зуг гемтә нег чигн күн орн-нутгин дотр илдкгдсн уга. Талдан орн-нутгас ирсн улс дунд 298 йовдл илдкгдв, эднәс 281 күн дәкнәс эрүл-менд болв.
Тиим кевәр мана ах-дү орн-нутг Моңһлд түгдг гемин өмнәс сагллһна чик кесг керг-үүлдвр күцәгдв, бичкдүдин болн сурһульчнрин эрүл-менд батруллһнд һол оньг өггдҗәнә.

Мана зәңгч

Видео