Бичкдүд халун хот-хоолар теткгдх

01-09-2020, 15:21 | Таңһчин зәңгс » Сурєуль-эрдм

Одахн Әрәсән гегән-герлин министр Сергей Кравцов регионмудын сурһуль-эрдмин органмудын элчнрлә селвлцә кев. Эклц классин сурһульчнриг халун хотар тетклһнә болн классин һардачнрт сар болһн немр мөңг өглһнә төрәр күүндвр болв. Видеоконференцин залһлдана эв-арһар селвлцән бүрдәгдв. Энүнд министрин дарукс орлцв.
Регионмуд сурһульчнриг халун хотар тетклһнә төрәр ик кемҗәтә көдлмш күцәв гиҗ селвлцәнә йовудт министрин негдгч дарук Дмитрий Глушко темдглв, тиигчкәд эн төриг күцәлһн «цуг регионмудар дигтә-даратаһар министерств, Цугәрәсән олн улсин фронтын (ОНФ) элчнр болн олна негдлтс бүрткх», гиҗ заав.
«Цуг неквриг тер дарунь күцәхәр зүткх кергтә, эк-эцкнрин бүрдәцст тодрхаһар күцәҗәх керг-үүлдврин тускар зәңгләд бәәхмн», – гиҗ Дмитрий Глушко регионмудын элчнрт дуудвр кев.
Классин цуг һардачнр һаха сарин нег шинәс авн шишлң немр мөңг – 5 миңһн арслң авх зөвтә гиҗ гегән-герлин министрин дарук Андрей Николаев олна оньгинь тусхав. Урднь класс һардлһна төлә региона кемҗәнд багшнрин авчасн немр мөңгн тер кевәрн үлдҗ җалвд немгдәд бәәх йоста.
Тиим немр мөңг өглһнә үнн-чик болн дигтә-дарата бәәдлиг күцәхин төлә онц мөрәр тооцана цааснд регионмудын болн федеральн төв өгчәх немр мөңгинь заах кергтә.
Тиим төриг Әрәсән Президент Владимир Путин Федеральн Хургт кесн илгәвртән тәвсмн. Халун хот-хоолар эклц классин сурһульчнриг теткхин төлә федеральн шаңһас 2023-ч җил күртл 108 җува һар арслң мөңгн өггдх.
Классин һардачнрт 2020-ч җилин һаха сарин нег шинәс авн 5 миңһн арслң немлт өглһнә туск төриг бас орн-нутгин толһач Владимир Путин тәвсмн. Эн саамд региона болн муниципальн йосна өгсн мөңгн тер кевәр цааранднь өггдәд бәәх йоста.
Цуг эн төриг күцәлһн Әрәсән гегән-герлин министерствин бүртклһнд бәәнә. Мана таңһчд бас күүкдиг халун хотар тетклһнә көдлмш Элстд болн райодар, селәдәр эклв. һаха сарин нег шинәс авн эклц классин бичкдүд халун хот өдртән нег дәкҗ уух зөвтә.

ҖААХАН Бадм

Видео