Бичкдүдт нааддг талвң кев

09-09-2020, 13:16 | Таңһчин зәңгс » Эндрк ґдрин тґрір

Элст балһсна ар-барун үзгт Теңгрин Уйдл гидг уульнцд бичкдүд нааддг талвң тосхлһна көдлмш төгсв. Эн болн хам-хоша бәәдг уульнцсин бичкдүдт цаган сергмҗтәһәр давулхин төлә сән таал тогтагдв. Шидр Элст балһсна администрацин толһач Дмитрий Трапезников углҗ тәвгдсн шин талвң йовҗ хәләв.
Эн уульнцд әмтн цаган соньнар давулхин төлә һазр йилһҗ хату девскр кев, баһчуд цогц-махмудан батрулхин төлә спортивн тренажермуд углҗ тәвв. Эн уульнцин бичкдүдт нааддг талвңд шишлң девскр делгҗ, эднә төлә әәмшг уга бәәдл теткв. Күүкд-көвүдин төлә ке-сәәхн кегдлмүд тәвв, тенд бичкдүд дошад, давшурар деер һарад, дөгәд наадхин төлә цуг таал бәәнә. Удл уга энд көвүд футбол наадхин төлә спортивн талвң тосххмн.
Хотл балһсна администрацин толһач шин талвңгиг хәләснә хөөн бичкдүд нааддг болн футбольн талвңгуд хоорнд харслһна гөлм тәвх кергтә гив. Тер мет энд олн зүсн модд болн цецгүд суулһҗ эргндк һазриг сәәхрүлх кергтә гиҗ Дмитрий Трапезников даалһвр өгв. Намрин серүн эклхлә энд эн көдлмш эклхмн гиҗ шиидгдв.

Мана зәңгч
ЗУРГТ: хотл балһсна Теңгрин Уйдл уульнцд углҗ тәвгдсн бичкдүдин талвң

Видео