Кимд эдл-ууш хулдгдв

21-09-2020, 16:32 | Таңһчин зәңгс » Эндрк ґдрин тґрір

Давсн амрлһна өдрмүдт Элст балһсна 155 җилин өөнд нерәдгдсн керг-үүлдврмүдин медлд селәнә эдл-ахун яарм болв. Терүг Хальмг Таңһчин селәнә эдл-ахун министерств болн Элст балһсна администрац бүрдәв. Таңһчин район болһн селәнә эдл-ахун эдл-ууш авч ирсн деер хам-хоша бәәдг регионмудын арһлачнр зер-земш, темс болн махна зүүтә хот-хол хулдв. Яармд махн, заһсн, темсн, зер-земш, һуйр, бал болн нань чигн хот-хол элвг билә. Балһсна 1-ч микрорайонд базрин талвңд болсн яармд әмтн өрүн эртәс авн шунмһаһар орлцв.
Хамгин түрүнд әмтн килвр мах хулдҗ авхар шунв. Селәнә эдл-ахус болн фермермүд мах авч ирв, энд үкрә, хөөнә, һахан болн шовуна махн килврәр хулдгдв. Махн 250 арслң күрв, тегәд әмтн хөөнә махиг бүкл көләрнь хулдҗ авв, үкрә махиг бас сәәнәр авв. УФСИН-ә Хальмг Таңһчар үүлддг заллт үкрә болн һахан мах бас хулдв, эдн эврә эдл-ахуд мал асрна. Үкрә махиг эдн дарунь хулдад, дәкәд тавн һахан мах хулдхар авч ирв. Яшкулин района «Улан хөөч» эдл-аху арвн хө авч ирәд, бас дарунь терүг хулдв. Эдн грозненск тохма хөд өскнә, терүнә махн шимтә болн сән амтта болдгиг әмтн сәәнәр медәд, дарунь хулдҗ авв. Октябрьск района «Хошуд» СПК 150 киил үкрә мах авч ирв, эдн бас дарунь терүг хулдад төгсәв. Хар Һазра района «Первомайский» эдл-ахуд кеҗ һарһдг махна зүүтә хот-хоолыг әмтн таасч хулдҗ авв, эднә көлгнә өөр чеерүд ик болв. Келхд, кесгнь махар кесн консервиг арвад-хөрәд шил хулдҗ авв. Эдл-аху эн яармд 500 шил консерв, 100 шил махта хаш, 50 шил дотр болн 50 киил махна зүүтә хот-хол авч ирв. Приютна района арһлач И.Падченко кет балг авч ирҗ, 30 арслңгар терүг хулдв. Заһснд дурта әмтн бас эднә өөр чеерүдт зогсҗахнь үзгдв.
Темдглхәс, яармд мана таңһчд урһасн темсн, зер-земш, бал болн һуйр хулдгдв. Тиигәд, Яшалтан района «Новая победа» эдл-аху эн яармд альм хулдв. Эдн 1200 киил альм авч ирв. Эн җил эдн му биш урһц хураҗ авч, «Кармен» гидг альмиг эдн 50 болн 25 арслңгар хулдв. Эн өдрмүдт эдл-ахуд үвлд хадһлдг альм хураҗ авхмн. Әмтн мана таңһчд экологическ цевр болн әмтәхн альм урһаҗахиг таасад, эдниг дөңнҗ альм сәәнәр авв. Цаһан Амнас авч ирсн адамч 20 арслңгар хулдгдв, тегәд эн өдрмүдт темс эд-бод кеҗ үвлд белдҗәх күүкд улс терүг яршгарнь хулдҗ авв. Сарпан района Садовое селәнд үүлддг предприять эн җилә буудяһар болһсн һуйр хулдв, 1 киилнь 26 арслң күрв.
Элст балһсна администрацин толһач Дмитрий Трапезников болн Хальмг Таңһчин селәнә эдл-ахун министр Мөңкнасна Максим яармд ирҗ, ямаран эдл-ууш энд хулдгдҗахиг, әмтн ямаран хулд кеҗәхиг хәләв. Дааврта һардачнр селәнә эдл-ахусин көдләчнрлә болн фермермүдлә харһҗ күүндәд, хулд яһҗ давҗахар соньмсв. Яармд сән таал тогтагдсиг тедн темдглв. Келхд, ДОСААФ яармд орлцачнриг халун хашар болн цәәһәр тоов.
Таңһчин селәнә эдл-ахун министрин дарук Сергей Антоновин келсәр, яармд 10 тонн махн, 3 тонн заһсн, 15 тонн буудя, олн зүсн темсн, зер-земш хулдгдв. Энд бәәрн предприятьмүд эврә һуйр, тос, махна зүүтә хот-хол болн бийснь урһасн альм хулдснь темдгтә. Яарм сәәнәр бүрдәгдв, әмтн өрүн эртәс авн хулд кехәр ирв, эдл-уушин үн базрин үнәс килвр болв, тегәд әмтн кергтә хулд кеҗ чадв. Иим яарм дәкәд чигн бүрдәгдх гиҗ зуралгдҗана. Тиигәд, селәнә эдл-ахун көдләчнрин сән Өдрт нерәдҗ иим керг-үүлдвр бас давулгдхмн, гиҗ дааврта һардач келв.

ДООҖАН Наталья

Кимд эдл-ууш хулдгдв
Кимд эдл-ууш хулдгдв

Видео