Эрдм шүүҗ авхднь туслхар

22-09-2020, 13:34 | Таңһчин зәңгс » Эндрк ґдрин тґрір

Хальмг Таңһчин әмтнә социальн теткврин комплексн төвд (КЦСОН) «Per aspera ad astra» («Через тернии к звездам») гидг федеральн төсвин керг-үүлдврмүд экләд күцәгдҗәнә. Эн төсв насни дигт күрәд уга бичкдүдт эрдм шүүҗ авлһнд туслх болн белдвр келһнд дөң-тус күргх күслтә.
Таңһчин комплексн төвин өрк-бүлмүдт болн бичкдүдт социальн дөң күрглһнә әңгин көдләчнр хамгин түрүнд психологическ шинҗллт кеһәд, күүкд-көвүдин тааслт учртан авч эдниг ямаран эрдм соньмсулҗахиг илдкҗ авв. Тиигәд, бичкдүдлә күүндснә болн эднлә шишлң тренинг давулсна хөөн эдниг соньмсулҗах эрдм йилһҗ авгдв. Эн төсвин медлд юм уйдгиг дасхдг «Алтн зүн» гидг мастерской секгдв. Терүнә төлә юм уйдг машинкс, хувц-хунр ишкдг ширә, илүр болн уячд кергтә талдан чигн тоот хулдҗ авгдв.
Уячин эрдмәр соньмсҗах күүкдин төлә бүрдәгдсн занятьст эдн дамшлтта багшин һардврт олн зүсн кегдлмүд уйдгиг болн хатхмр хатхдгиг дасчана. Күүкдт хальмг зег хатхдг дасхҗахнь ик байр үүдәнә. Мергҗлтән өөдлүләд, ке-сәәхн хатхмр хатхдг дасч авсна хөөн эдн хальмг келн-улсин хувц болн махла уйж, терүг хатхмрар кеерүлхәр зуралҗана.
Күүкд занятьст баг-багар орлцна, тегәд эс медгдсн тоотыг эдн багшас сурад, онц кевәр дасч авна. Келхд, уячин эрдм дасчах күүкдиг халун хотар теткнә. Пандемий учрсн цагт бичкдүд әәмшг уга бәәдлд эрдм дасч авхин төлә энд санитарн-эпидемиологическ некврмүд күцәлһнд ик оньг өггднә. Тиигәд, бичкдүдиг саглуллһна эв-арһсар болн чирәдән өмсдг медицинск хааһулар теткв, занятьс болдг бәәрнд рецеркулятормуд углҗ тәвгдсн бәәнә. Эн занятьст олн үртә, баһ тетквртә өрк-бүлмүдин болн җирһлин күнд таалд туссн бичкдүд орлцна.

ДООҖАН Наталья

Видео