Шин эмнлһс тосхгдх, шишлң көлгн йилһгдх

26-10-2020, 16:41 | Таңһчин зәңгс » Эрўл-менд харлһн

Давсн долан хонгт Хальмг Таңһчин эрүл-менд харлһна министр Кикенә Юрий сүл хойр җилин эргцд күцәгдсн көдлмшин аш диглҗ, таңһчин әмтнд медицинск дөң күргһлнә чинриг ясруллһна туст кегдҗәх кергүдин тускар келҗ өгв. Пандемий учрснас иштә Юрий Викторович таңһчин олнд зәңгллһнә эв-арһсин көдләчнрлә харһад уга билә, тегәд харһлтын йовудт министрт кесг төрәр сурвр өггдв.
Харһлтын эклцәр министр түрүн медицинск дөң күрглһиг ясруллһна тускар келәд, нидн мана таңһчд 6 ФАП тосхгдх гиҗ зуралгдсна ормд 12 обьект эдлврт орулгдв гив. Эн җил болхла таңһчин селәдт 8 фельдшерск-акушерск пункт тосхгдхмн билә, терүнә ормд 19 объект үүлдврән эклхмн. Эн өдрмүдт зәрм селәдт тосхлтын көдлмш төгсхдән өөрдҗ йовна. Темдглхәс, зәрм селәдт урднь ФАП уга билә, эс гиҗ хуучрад нурад унҗасмн. Тиигәд, хойр җилин туршарт мана таңһчд 31 ФАП тосхгдснь бичкн селәдт бәәдг әмтнд эмчин дөң күрглһнә төр хаһлгдв.
Сүл хойр җилин эргцд таңһчин эмнлһсин материальн-техническ ул батруллһна төр бас күцәмҗтәһәр хаһлгдв. Тиигәд, Лаганя, Яшалтан болн Сарпан райодын эмнлһсин улд райод хоорндк медицинск төв бүрдәгдҗәнә, эдниг өдгә цага сән медицинск кергсләр теткҗәнә. Зүркнә-судцин төвд, гүлгн гемәс хөрлһнә диспансерт бас өдгә цага оборудовань углҗ тәвгдв. Үлгүрнь, күүкд улсин эрүл-менд шинҗллһнә маммограф, гүн шинҗллт кедг КТ-аппарат болн гистологическ кергсл ода диспансерт бәәнә. Таңһчин эмнлсһин информатизацин төр бас хаһлгдҗана, терүнә йовудт 1432 автоматизированн көдлмшч орм бүрдәгдв.
- Мана таңһчд сүл һучн-тәвн җилин эргцд эмнлһсин бәәрн тосхгдад уга гиҗ келҗ болҗана. Эн җил Приютн селәнд психоневрологическ диспансерт ясвр кегдв, нидн П.Жемчуевин нертә таңһчин эмнлһнд ясвр төгсв. Ода Троицк селәнд шин медицинск төв секхин төлә ясврин көдлмш кегдҗәнә, терүнд Лукойл 90 сай асрлң йилһв. КТК-Р Ик Буурла района эмнлһнә ясвр келһнд бас мөңг йилһҗәнә. Хальмг Таңһчин социальн-экономическ делгрлтин онц көтлврәр Элстд дәәнә ветеранмудын госпиталь тосхгдхмн, тенд геронтологическ болн реабилитацин төв үүлдхмн. Госпиталин өөр гүлгн гемәс хөрлһнә төв тосхгдхмн. Эн хойр төв тосхгдхла таңһчин эмнлһнд бәәрн сулдхгдх, тер цагт тенд шин әңгүд секҗ болхмн. Әрәсән хальдврта гемәс хөрлһнә цергллтин делгрлтин көтлврин медлд мана таңһчд госпиталь тосххмн. Элст балһсн терүнд тасрха һазрин меҗә йилһсн бәәнә, тосхлтын көдлмш ирх җилд эклхмн. Эн кергт күсдундур җува арслң йилһгдхмн, тер мөңгн кергсләр тетклһнд бас олзлгдхмн. Шин госпитальд КТ, УЗИ шинҗллт келһнә аппаратмуд бәәхмн. Тер мет Приютное селәнд болн Городовиковск балһснд шин эмнлһс тосхгдхмн. Эн җилин чилгчәр хотл Элст балһснд бичкдүдин поликлиникин тосхлт төгсхмн, – гиҗ Юрий Викторович келв.
Пандемий учрснас авн таңһчин эрүл-менд харлһна көдләчнр күнд бәәдлд тусв. Эдн эн хальдврта гемәс әмтиг эдгәҗ авхин төлә эврәннь әмән әрвллго көдлҗәнә. Харм төрхд, эдн дунд коронавирусар кесгнь бас гемтв. Тиигәд, зурһан зу һар эрүл-менд харлһна көдләч талдан улст дөңгән күргҗ госпитальд көдлҗәһәд эн гемәр хальдв. Гемтә улсин то икдҗәхәс иштә немр орм бүрдәгдҗәнә, тегәд эмчнр болн дунд медицинск көдләчнр кергтә болҗана. Хальмг Таңһчин Толһач Хаска Бату мана баһчуд сурчах медицинск вузмудын һардврт бичг бичәд, эн күнд цагла таңһчдан дөңгән күргхиг баахн улсиг сурв. Медицинск институтмудын 6-ч курст болн ординатурт сурчах 61 күн төрскн таңһчдан ирҗ көдлхмн гиҗ күләгдҗәнә.
Таңһчин эмнлһсиг шишлң көлгәр тетклһнә төр бас сүл җилмүдт хаһлгдҗахиг министр темдглв. Сүл хойр җилд Лукойл болн КТК эн кергт шунмһаһар орлцв. Ода түргн туслмҗ күрглһнә станцс кергтә көлгн-күчәр теткгдсн бәәнә. Таңһчин район болһнд B болн C классин машид бәәнә. Удл уга мана таңһчур дәкәд 12 шишлң көлгн ирхмн, терүг Элстд үлдәҗ немр бригадмуд бүрдәх шиидвр авгдв гиҗ Юрий Викторович хувалцв.
- Таңһчин эрүл-менд харлһна көдләчнр коронавирус гемәс хөрлһнә кергиг үнн-чик седклтәһәр болн даавртаһар күцәҗәнә. Эдн удан цагтан өөрхн элгн-садан, үрдән үзлго гүҗрҗ көдлҗәнә. Эн күчр цагла эдн әмән әрвллго көдлҗәхд би күн болһнд ик ханлтан өргҗәнәв, – гиҗ министр харһлтыг товчлҗ келв.

ДАВАН Наталья

Шин эмнлһс тосхгдх, шишлң көлгн йилһгдх

Видео