Баһчудт омг өгч магтдмн

13-11-2020, 16:03 | Таңһчин зәңгс » Күн болн җирһл

Давсн зун җилин 60-ч җилмүдт мана орн-нутгт, тер тоод Хальмг Таңһчд, баһчуд механизаторин эрдм дасч төрскн селәндән көдлхиг урмдуллһна керг бүрдәгдсмн. Мана таңһчд зу һар күүкн-көвүн тер кергт орлцв. 1973 җилд мана таңһчд күүкд улсин түрүн тракторн бригад Целинн района «Балковский» совхозд бүрдәгдсмн. Бәәрн селәнә күүкд улс «Улан альчур» гидг бригад бүрдәҗ, селәнә эдл-ахун халхд көдлҗ йовсмн. Тер бригадын ханьд көдлҗ йовсн Манҗин Тамара тер цага тодлврмудар хувалцҗ, Басан Городовиковла харһҗ йовснаннь тускар келҗ өгв.
Тамара Дмитриевнан келсәр, эн селәнә күүкдлә хамдан механизаторин эрдм дасад, төрскн эдл-ахудан тракторн бригадт көдлв. Эн бригадын ханьд Галина Достаева, Зоя Мельникова, Валентина Эрдниева, Любовь Бальджикова, Валентина Селюк, Галина Калыкова, Капа Кичикова, Любовь Очирова билә. Эднә бригадын төлә шин трактормуд йилһгдсн билә. Эдн МТЗ-80 болн ЮМЗ гидг тракторар хаврин болн намрин кемд тәрә тәрлһнд, урһц хуралһнд, аца зөөлһнд орлцдг билә. Эврәннь селәнә эдл-ахуд олн зүсн көдлмш күцәддг деерән эдн хам-хоша регионмудт малд хот белдлһнд, өвс хадһлһнд орлцсиг Тамара Дмитриевна тодлна.
- Басан Городовиковла би эн бригадт көдлхәс урд харһсн биләв. Мини эцк Дмитрий Нугдыкович Манджиев нүүрлгч хөөч билә, зураһан давулҗ сән чинртә төл авч, терүгән бүрн-бүтнәр хадһлсн болн дала ноос кирһҗ авсн төләдән Күч-көлснә Улан Тугин орденар ачлгдсмн. Сурһулян төгсәснә хөөн би эцкдән дөң болад, малын хошт көдлдг биләв. Мана бригад ик күцәмҗ бәрҗ үүлддг төләд намаг Моңһл орн-нутгт йовулв. Тиигәд би Советск Союзин делагацин ханьд ах-дүүнрин һазрт одлав. Хөөннь «Улан альчур» бригадын ханьд көдлҗәхдм Басан Бадьминович мана совхозд ирхләрн мини өрк-бүлин бәәдл-җирһләр соньмсҗ, эцкдм менд келүлдг бәәсмн. Комсомолын района болн обкомин гешүн болҗ олна бәәдл-җирһлд шунмһаһар орлцдг төләдән кесг хургт, керг-үүлдврт таңһчин һардачла бас харһлав. Басан Бадьминович әмтнлә йир тевчңгү, өр-өвч седклтә күн билә, уга-яду улст дөңгән күргхәр шундг бәәсмн. Мана селән һол хаалһас 9 дууна һазрт бәәнә, тегәд көдлмшин кергәр йовсн цагтан кедү дәкҗ эн мана бәәрн улсиг эврәннь машиһәр күргсн болх. Таньлдсна хөөн Басан Бадьминович тер күүнә нер мартлго, дәкн харһхларн эрк биш мендинь сурҗ, көдлмшин, гер-бүүрин төрмүдәр соньмсдг билә. Хальмгин алдр үрн мана таңһчин күн болһна тодлврт тиим цаһан седклтә, чадмг болн төрскнч седклтә болҗ үлдхнь лавта, – гиҗ Тамара Дмитриевна келнә.
«Улан альчур» бригадын ханьд трактористар көдлҗ йовсн күүкдлә харһхларн Басан Городовиков эднәр бахмҗ кедг билә. Баахн күүкд төрскн селәндән үлдҗ иим күнд көдлмшт көдлҗәхнь, таңһчин селәнә эдл-ахун делгрлтд тәвцән орулҗахиг эн йоста залу-зөрмг йовдлд тоолдг бәәсмн. Келхд, эн бригадын күүкдин тускар «Крестьянка» журналд статья барлгдсна хөөн орн-нутгин булң болһнас эднә нернд бичг ирдг бәәсмн.

БАТАН Наталья

Видео