Магомаевин дуд энүнд таасгдна

23-11-2020, 15:45 | Таңһчин зәңгс » Сойл

Үкр сарин 15-с авн 18 күртл Грозный балһснд «Орфей-2020» гидг нарт-делкән фестивальн-марһан болв. Эн СССР-ин олн-әмтнә дууч Муслим Магомаевин санлд нерәдгдсн билә. Эн марһаг Чеченск Республикин сойлын министерств бүрдәҗ «Сойл» гидг келн-улсин төсвин «Чечнян билгтә улс» гидг региональн көтлврин медлд давулв. Терүнд мана ик орн-нутгин кесг регионмудын болн маднла хам-хоша бәәдг һазадын орн-нутгудын элчнр орлцв.
Чеченск Республикин сойлын министр Хож-Бауди Дааевин темдглсәр, эн нарт-делкән марһан билгтә баһчудт дөң күрглһнд, эднә билг-эрдмиг делгрүллһнд, келн-улс болн регионмуд хоорндк хәрлцә батруллһнд болн нер һарсн Муслим Магомаевин нер мөңкрүллһнд туслна. Марһана жюрин ханьд нертә артистнр, орн-нутгин нүүрлгч театрмудын дуучнр, ГИТИС-ин болн Московск сойлын институтын багшнр болн нань чигн ачта улс орв.
Хальмг Таңһчас эн марһана ашлгч девсңд Хар Һазра района сойлын төвин дууч Лиҗ-Һәрән Оксана орлцад, Муслим Магомаевин дуулҗ йовсн «Лучший город земли» болн хальмг «Арл ду» гидг дуд дуулв. Марһана ашар хальмг күүкн 2-ч девсңгин дипломар ачлгдв. Оксана районд болн таңһчд болдг кесг марһаст орлцҗ, нүүрлгч орм эзлҗ, еңсг сәәхн дууһарн олна седкл авлна. Нарт-делкән марһан-фестивальд уйн наста дууч ик күцәмҗ бәрснь Хар Һазра района бәәтхә, таңһчин улст ик байр-бахмҗ үүдәв.

Мана зәңгч

Видео