Хаслһна диг-даран 2022 җил күртл утдулгдв

24-11-2020, 15:34 | Таңһчин зәңгс » Эрўл-менд харлһн

Шидр Әрәсән Роспотребнадзорин һардач Анна Попова олн-әмтн цуглрдг һазрт медицинск хааһулыг олзллһна, нег-негнәсн күсдундур метрт бәәлһнә болн коронавирус гемтә улсла хәрлцсн цагт хойр долан хонгт гертән бәәлһнә хаслһна диг-даран 2022 җилин туула сарин 1 күртл утдулгдҗахин туск тогтаврт һаран тәвв. Тиигәд мана орн-нутгт эн санитарн некврмүд эрк биш күцәгдх зөвтә болҗана. Мана таңһчд Роспотребнадзорин санитарн некврмүд күцәлһиг бүртклһнә керг-үүлдврмүд дару-дарунь давулгдна. Министерствсин болн ведомствсин хамцу көдлмшч багмуд хулд-гүүлгәнә болн олна көлгн-күчнә объектсиг шинҗлнә.
Хальмг Таңһчин эрүл-менд харлһна министерствин то-дигәр пандемий эклсн цагас авн хальдврта гемәр гемтсн улсин то 11194 болв. Сүл хонгт дәкәд 81 күн гемтв. Гемнь гиигн кевәр болн медмҗән угаһар давҗах 4251 күн амбулаторн кевәр эмнлһ авчана. Эдниг кергтә эмәр теткҗәнә, эмчнр эднә эрүл-мендин бәәдл бүрткҗ хәләнә. Госпитальмудт ода эмнлһнд 502 күн бәәнә. Таңһчин эмнлһнә улд үүлдҗәдг 3-ч тойгта госпитальд ода 237 күн, теднә тоод Деед Яшкульд 4 күн эмнлһ авчана. Райодт бәәдг госпитальмудт эмнлһ авчах улсин то невчк баһрв. Ода деерән Яшкульд 40 күн бәәнә, Көтчнрә, Хар Һазра, Үстин райодын госпиталь болһнд хөрәд һар күн бәәнә. Һундл төрхд, сүл хонгт эн хальдврта гемәс көлтә насан барсн улсин то икдәд, 131 –д күрв. Эмнлһ авсна хөөн 8711 күн эдгв, теднәснь сүл хонгт 98 күн болна.

Мана зәңгч

Видео