Селәнд көдлҗәдг багшнрт – 1 сай арслң

30-11-2020, 12:21 | Таңһчин зәңгс » Сурєуль-эрдм

Эн җиләс авн мана орн-нутгт «Земск багш» гидг көтлвр экләд күцәгддг болв. Селән һазрт бәәдг сурһульд багшнр йовҗ көдлхиг урмдулхин төлә эн көтлвр батлгдсмн. Дәкәд селәнә бичкдүд гүн медрл авхин, эднә сурһуль-эрдмин чинр ясрулхин төлә эн көтлвр бас туслх күслтә болҗана. Эн сурһулин җилд мана таңһчин селәдт бәәдг сурһульд арвн долан земск багш көдлдг болв. Тедн дунд Ик Царң селәнә 1-ч тойгта сурһулин орс келнә багш Җимбин Виктория болна.
Виктория Саранговна дамшлтта багш гиҗ келҗ болҗана. Эн өөдән категорин багш болна, сурһульчнрнь орс келәр болдг Цугәрәсән болн нарт-делкән олимпиадт гүн медрл үзүлҗ призермуд болсмн. Темдглхәс, эн урднь Ик Царңга 1-ч тойгта сурһульд арвн дөрвн җилдән багшлҗ йовсмн. Тегәд эн сурһуль шүүҗ авснь хара биш, энд урднь хамдан көдлҗ йовсн үүрмүднь бәәнә, селәнә бәәрн әмтн энүг сәәнәр меднә. Хөөннь эн Хальмг келн-улсин гимназьд тавн җилдән көдлв, Элст балһсна 12-ч сурһульд һурвн җилдән багшлв. Тегәд эн көтлврт орлцҗ селәнд көдлҗ болхин тускар медхләрн Виктория Саранговна Хар Һазра района Артезиан, Ик Буурла – Ут-Сала болн Октябрьск – Ик Царң селәдәс шүүҗ авх кергтә болхла урднь көдлҗ йовсн сурһульд одхар шиидв.
- Би эн сурһульд ирҗ көдлҗәхдән байрлҗанав. Сурһулин директор Валентина Улюмджиевна Цаганова болн багшнр намаг сәәнәр тосв, ямр нег төр учрсн цагт дөң-тусан күргнә. Эн көтлврәр би энд тавн җилдән көдлх зөвтәв. Эврән би Цаһан Нур селәнд өсәд-бослав, тегәд төрскн һазртан хәрҗ ирв гиҗ келҗ болҗана. Би орс келнә багшв, тегәд 9-ч болн 11-ч классмудын сурһульчнрла шүүврт белдвр кеҗәнәвидн. Орс келәр болдг олимпиадт, бичмр көдлмшсин марһаст сурһульчнр бас орлцҗана. Тиигәд төрскн һазр-усна йиртмҗин, Әрәсән темдгүдин төрмүдәр болсн марһаст сурһульчнр районд дииләчнрин тоод орв, – гиҗ Виктория Саранговна келв.
Орс келнә багшар көдлсн деерән эн 5-ч классин һардач болна. Класст арвн дөрвн сурһульч сурна. Пандемий учрснас иштә олн әмтн орлцдг керг-үүлдврмүд давулҗ болшго болв, тегәд эдн онлайн кевәр болдг марһаст билг-эрдмән болн гүн медрлән үзүлнә. Класст сурһульчнрин то ик биш болҗахас иштә багш күн болһнд онц килмҗән тусхана.
Селән һазрт сурһульмудт орс болн англь келнә, эсвин багшнр кергтә болна. Харм төрхд, баһ наста улс селәнд көдлхәр седхш. Дәкәд баһчуд багшин эрдм шүүҗ авхдан шунхш, тегәд сурһульд нурһлҗ наста улс көдлнә. Тегәд иим көтлвр батлгдснь эн чинртә төр хаһллһнд туслҗана. Келхд, Октябрьск района Восход селәнд эсвин багш Санҗин Валентина бас эн көтлврәр ирҗ көдлҗәнә. Селән һазрт көдлхәр ирсн багшнр нег сай арслңга дем авв.

ДАВАН Сәәхлә

Видео