Йөрәлч бичкдүд

16-12-2020, 18:48 | Таңһчин зәңгс » Сурєуль-эрдм

Эн марһанд 13-с авн 15 нас күртл бичкдүд орлцв. Эдн хальмг келәр Зулын йөрәл тәвҗ, төрскн келән сәәнәр меддгән үзүлсн деерән, билг-эрдмән һарһҗ жюрин гешүдт таасгдх бәәсмн. Ут тоодан марһанд 80 күүкн-көвүн орлцв. Жюрин ахлач Элст балһсна һардврин толһачин дарук Васькина Галинад тедн дундас зуг арвн кү йилһҗ авхд йир күнд болв. Бичкдүд хальмг кел сәәнәр меддгән үзүлҗ, жюрин гешүдт йир таасгдв. - Эн марһан иргчдән сән авъяст тохрҗ җил болһн давулгдх гиҗ санҗанав. Җил ирвәс терүнд орлцачнрин то икдтхә. Бичкдүдин эк-эцкнрт болн хальмг келнә багшнрт онц ханлт өргҗ, күүкдкөвүдиг белдҗ эн марһанд орлцхин төлә эдн ик дөң-тусан күргсмн,- гиҗ Галина Васильевна келв. Марһана ашар арвн дииләч йилһҗ авгдв. Теднә тоод Хальмг этно-сойлын гимназин сурһульчнр Ванькан Савһр болн Долонтан Борис, Хальмг келнулсин гимназин сурһульч Дорҗин Алдр, 15-ч тойгта сурһулин элчнр Нюрюпа Олег болн Довдана Таши, Элстин олн халхин гимназин сурһульч Очра Денис, 4-ч тойгта сурһулин сурһульч Климован Даяна, Элстин лицейин элч Анҗра Амалия орв. Хальмг күүкд-көвүдлә зерглҗ талын келн-улсин бичкдүд хальмг кел сәәнәр меддгнь байрта болв. Элстин 2-ч тойгта сурһулин сурһульч Саргсян Каро болн Хальмг келн-улсин гимназин сурһульч Харченкон Кирилл Зулын йөрәл сәәхн хальмг келәр келснь бахмҗ үүдәв.
ДООҖАН Наталья