Бурятин КВН-щикүдиг дөңнхин төлә

09-02-2021, 15:34 | Таңһчин зәңгс » Сойл

КВН-д орлцдг Бурятин билгтә баһчуд президентск грант шүүҗ авв. Эдн «Мусор в голове» гидг программ белдәд, олна оньгт терүгән үзүлв.
Социальн чинртә төсв болҗана гиҗ эднә программиг жюри үнлв. Ут тоодан президентск грантын шүүврт 10 миңһн программ орулгдсмн. Теднәс 2 миңһн төсв шүүҗ авгдв. Тер төсвсиг күцәлһнд федеральн бюджетәс 4,2 миллиард арслң йилһгдҗәнә. Бурятин КВН-щикүдин программ тер грантыг шүүҗ авв.
КВН-а җисәнә эк татач болн олна үүлдәч Чингис Болотов, зүүцүләч Юлия Воронина, зурач Табату Мердыгеев, редактор Елена Федосеева болн менеджер Иван Логинов күцәмҗтә эн төсвиг белдсмн. Эргндк орчлңгиг харлһнд нерәдсн ниигмлгин (социальный) ик чинртә эн төсв Хол Дорд үзгт болдг кесг фестивальд болн марһанд орлцҗ, нүр орм эзлсмн. Тер тоод олна керг-үүлин чинртә мөрәг – «Хол Дорд үзгин Одн -2019» гидг мөрә шүүҗ авсмн.
«Президентск грант маднд сансн тоотан күцәхд ик дөң болхмн. Байкалын эргндкиг бузрдалго, энд ирҗ амрхларн бийән ик даавртаһар, цевр-цеерәр бәрдг зуульчнриг сурһмҗлхд туслх», – гиҗ төсвиг белдсн баһчуд тоолҗана.
ҖИРҺЛИН Кермн

Видео