«Хаврин дун» - билг-эрдмин марһан

09-02-2021, 15:50 | Таңһчин зәңгс » Сойл

Лу сар эн җил нарта дулан өдрмүдәр экләд, әмтиг байрлулсн йовдл сойлын көдләчнрин үүлдврт урмд өгв. Келн-улсин оркестр дарани нег төсвиг эклҗәнә. Цаһан Сарин байрин сергмҗиг цааранднь өргҗ делгрүлхәр «Хаврин дун» гидг марһа зарлҗана. Келн-улсин делгрлтин төрәр үүлддг федеральн агентствин болн таңһчин сойлын министерствин дөңгәр кегдҗәх дууна марһан лу сарин 13-с авн зарлгдҗана.

Эн төрт нерәдсн брифинг «Калмыкия» РИА-д лу сарин 5 болв. Таңһчин сойлын болн туризмин министрин дарук Лариса Летуева, Келн-улсин оркестрин художественн һардач Савр Катаев, оркестрин администратор Евгений Бембеев орлцҗ, марһана тускар журналистнрт келҗ өгв.
Марһанд орлцх саната әмтн моһа сарин 20 күртл эрлһән орулҗ өгх зөвтә. Тиигәд лу сарин 13-с авн 20 күртл түрүн девсңгин йовудт әмтнә эрлһс орулҗ авгдҗ, кен терүнд орлцхнь диглҗ авгдхмн.
Марһана хойрдгч девсңгнь моһа сарин 24-әс авн мөрн сарин 20 күртл һазр-һазрар санитарн-эпидемиологическ цуг зааврмуд күцәҗ давулгдхмн. Эн девсңд марһана ашлгч дөрлдәнд орх дуучнр йилһҗ авгдхмн. Онлайн болн офлайн янзар шүүврин хәләвр кегдхмн. Марһана ашлгч девсңгнь мөрн сарин чилгчин алднд болх. Цагин болн пандемийин бәәдләс иштә тер гала-концерт альд болхнь өөрдҗ йовад йилһгдхмн.
Гала-концерт ик өргмҗин бәәдлд Хальмгин нертә артистнрин орлцлһтаһар болхмн. Хавр ирсиг тиигәд нертә артистнр чигн, дуунд дурта улс чигн ик байртаһар билг-эрдмәрн медүлхмн. Яһдг болвчн әмтн концертиг өңгәр хәләҗ чадхмн. Тиигчкәд марһана видеоһарц Интернетд эрк биш үзүлгдхмн. Төрскн келиг өргҗүлх, улсин билг-эрдмиг делгрүлх күслтәһәр марһан кегдҗәнә, гиҗ марһана бүрдәһәчнр тоолҗана.
Ирсн айстан оркестрин һардач Савр Катаев хөн сарла көгҗмч Петр Чонкушовин үүдәврмүдин фестиваль кех зураһарн хувалцв. Нер һарсн көгҗмчин ачнрнь дөң болх зөвшәлән медүлснә тускар Савр Катаев соңсхв. Хальмгин түрүн профессиональн көгҗмчин үүдәврмүдин челендж интернетин дөңгәр зарлсн оркестрин коллектив фестивальд белдлһнә көдлмшән эклчкв.
Иигәд сойлын җирһлин йовуд хаврин серглң салькиг дахҗ урмд авчана. Әмтнд болхла эннь сергмҗтә йовдл мөн.

Галина ХЕЙЧИЕВ

Видео