Өвкнриннь йосан хадһлый!

25-02-2021, 13:09 | Таңһчин зәңгс » Сурєуль-эрдм

Шидр Элст балһсна Очра Номтын нертә 8-гч тойгта дундын сурһульд Цаһан сарин байрт болн нарт-делкән төрскн келнә Өдрт нерәдсн керг-үүлдврмүд давулгдв.

Төрскн келән хадһлхин төлә арвн хоӊгин эргцд ик көдлмш кегдв. Школын хальмг келнә методическ негдлтин багшнр Валетан Эльза, Окуна Светлана, Фирсовин Саглара күүкдт ик килмҗән өгәд, соньн кичәлмүд бүрдәһәд, сурһульчнрт уул кел дасхна. Багшнр олн зүсн эв-арһ кичәлмүдтән олзлад, келлһ өргҗүллһнә көдлмшт ик оньган өгнә.
Эн өдрмүдт дару-дарунь олн зүсн марһас давулгдв, сурһульчнр терүнд шунмһаһар орлцҗ, хальмг улсин авъяс, сойл, төрскн һазр-усна тууҗ сәәнәр дасч авсан үзүлв.
Хальмг улсин хамгин ик чинртә болн күндтә байр – Цаһан сар – эн җил лу сарин 12-т темдглвидн. Цаһан сар ямаран учр-утхта байр болдгинь, терүнд яһҗ белддгин тускар, тер мет хальмг улс яһҗ цаһалдгин тускар тодрхаһар багшнр медүлв.
1-ч «а» болн «б» классмудын сурһульчнр «Цаһан сар» гидг нерәдлһтә нәәрән үзүлв. Ке-сәәхн хальмг хувцан өмсәд, билг-эрдмән үзүлв, хальмг улсин амн урн үгин зөөриг йилһән сәәнәр меддгән иткүлв.
Эклц классмудын хоорнд Цаһан сарин байрт нерәдгдәд, эрсин газетмүдин марһан зарлгдв.
Төрскн келнә чинртә төрт нерәдгдсн керг-үүлдврмүдт эклц классмудин сурһульчнр Он-лайн йөрәлин марһанд орлцв. Түрүн орм эзлснь – 2 «б» классин сурһульч Эрднен Бату. 5-8-гч классин көвүд-күүкд Он-лайн шүлгүд айслулҗ умшв. Тедн дунд 6 «б» әңгин сурһульчнр – Хоҗһра Савр, Санган Миня, Полтанкин Эрика, Шаран Айлана болн нань чигн сурһульчнр энд йилһрв.
Цуг зуралсн керг-үүлдврмүд өөдән кемҗән давулгдв, улан залата хальмгуд алдр тууҗта, сәәхн келтә, байн сойлта болҗахиг сурһульч болһн тодлҗ авснь лавта.
Хальмг келн – мини келн, гиҗ күн болһн санҗ, аав-ээҗиннь төрскн келән дасч хадһлх зөвтә.
Төрскн келиг төрхәрә заяч маднд заяла, тегәд бидн хальмгар му-сән болвчн күүндх зөвтәвидн. Эс гиҗ ээҗ-аавин келн тасрхан уга геедрхмн болҗана.
Нарт-делкән төрскн келнә Өдр хальмгудын авъяст тохрҗ, олна седкл негдүлҗ, һазр деер сән-сәәхн бәәдл-җирһл делгрүллһнд нилчән күргхнь лавта. Кезәд чигн өвкнриннь йосан бәрҗ, келән хадһлҗ, цуһар менд бәәцхәй, – гиҗ дурдҗанав.
Окуна Светлана,
Элст балһсна Очра Номтын нертә 8-ч дундын школын
хальмг келнә багш

Видео