Билг-эрдмин марһанд орлцх

27-02-2021, 14:08 | Таңһчин зәңгс » Күн болн җирһл

Элст балһсна медәтнрин болн гемтә-шалтгта улсин гер-интернатд бәәдг Валерий Чекушенков НТВ телекомпаня «Ты супер 60+» гидг соңсхврин кастингд орлцхмн. Таңһчин социальн бүрдәцст бәәдг улс дундас Валерий Юрьевичиг шүүҗ авад, эн марһанд орлцх эрлһинь йовулв.
Валерий Чекушенков җирн дөрвтә, эн баһ цагасн авн олн зүсн билг-эрдмин марһаст орлцдг бәәсмн. 1978-ч җилд Тверь балһснд билгтә баһчуд болн оютнр дунд болсн дууна марһанд 1-ч орм эзлсмн. Эн гитар цокна, саксофонд наадна. Элст балһснд ЖБИ-д көдлҗ йовхдан профсоюзмудын сойлын Герт «30 һарсн улс» гидг концертн көтлвр давулдг билә. Ода Валерий Юрьевич медәтнрин болн эрмдгтә улсин гер-интернатд «Ицл» гидг эврә сән дурар үүлддг художественн клубин солист болна. Эн Юрий Антоновин болн Евгений Мартыновин үүдәлтд дурта, эднә дуд дуулхдан таасна.
- Эн марһанд орлцҗ урднь тәәз деер һарч үүмдг бәәсән тодлхв. Нанд җирһлин хаалһдм учрдг шинрлтс урмд өгнә, билгтә болн соньн улсла таньлдхдан байрлхв, – гиҗ Валерий Юрьевич келнә.
НТВ телекомпань «Ты супер 60+» гидг соңсхврт орлцх улс дунд кастинг давулҗахин тускар зәңглв. НТВ-н генеральн продюсерин дарук Вадим Такменев таңһчин социальн делгрлтин, күч-көлснә болн көдлмшәр тетклһнә министерствин хайгар бичг бичәд, эн төсв дөңнхиг сурв. Эн социальн төсвд көгшдин, шишлң гер-интернатд бәәдг болн олн зүсн учрар өөрхн улсин килмҗ угаһар ор һанцарн үлдсн билгтә улс орлцҗ чадҗана. Тер мет күүкднь талдан балһсдт бәәдг медәтнр бас терүнд орлцҗ, билг-эрдмән үзүлхмн. Эн марһанд орлцх улс кастингин ашар медгдх. Марһан Москвад болхмн, НТВ телекомпань хаалһин, хотл балһснд бәәлһнә болн хот-хоолар тетклһнә һаруг даңцахмн. Төсвд орлцачнрт психологуд болн эрүл-менд харлһна көдләчнр дөң-тусан күргхмн.

БАТАН Наталья

Видео