Хальмг келнә багш Цугәрәсән марһанд ончрв

02-03-2021, 14:06 | Таңһчин зәңгс » Сурєуль-эрдм

Кичгә Төлән нертә Хальмг Келн-улсин гимназин хальмг келнә багш Довуркан Кару «Төрскн келнә, тер тоод орс келнә, багшнрин Цугәрәсән мастер-класс – 2021» гидг марһанд диилвр бәрв. Эн марһаг РАНХиГС-ин сурһуль-эрдмин делгрлтин федеральн институтын (ФИРО) келн-улсин төрмүдин номин-шинҗллтин төв бүрдәҗ давулна. Эн Москвад лу сарин 26-с авн 28 күртл болв. Терүнд ут тоодан 33 гешүн орлцв. Дагестана, Чувашин, Ингушетин, Карелин, Удмуртин, Чечнян болн нань чигн талдан регионмудын төрскн келнә багшнр хоорндан марһлдв.
Марһанд орлцачнр цуһар төрскн келнә, тер тоод орс келнә, Ассоциацин гешүд болна. Төрскн келнә багшнрин Цугәрәсән мастер-класст болн «Созвучие культур и языков» гидг марһанд орлцсн багшнр марһлдх зөв авсмн. Марһанд орлцачнр төрскн келнә кичәл давуллһна эв-арһла таньлдулх, келн-улсин хувц-хунр, сурһульчнриннь һарин эрдмин кегдлмүд көдлмштән ямр кевәр олзлҗахан үзүлх зөвтә бәәсмн. Жюрин ханьд Әрәсән олн-әмтнә Ассамблейин исполкомин, ФИРО-н келн-улсин төрмүдин номин-шинҗллтин төвин, Әрәсән Олна палатын элчнр орв.
Хальмг Келн-улсин гимназин һардач Ченкуран Екатеринан келсәр, сурһуль-эрдмин бүрдәцин баахн багш Цугәрәсән марһанд ончрад диилвр бәрснь хамдан көдлҗәх үүрмүдтнь болн сурһульчнрт ик бахмҗ болв. Довуркан Кару бийнь Көтчнрә района Ергенинск селәнд өсәд-боссмн, хальмг келндән хару, төрскнч седклтә күн болна. Эн гимназьд Кару Саналович хальмг ик сурһуль төгсәснә хөөн хойр җилдән багшлҗана. Оютн бәәсн цагтан эн гимназьд ирҗ дамшлт хоршасмн, тегәд сурһулян төгсәхләнь энүнд гимназьд ирҗ көдлх үрвр кегдв.
– Баахн болв чигн Кару Саналович ямр нег кергиг, дааврта һар күцәдг, үнн-чик седклтә багш болна. Эн 6-ч классин һардач болҗ көдлнә, килмҗән тусхаҗ, цаһан седклән медүлҗ күн болһна нәәһинь олҗ күүкд-көвүдт нүдн-амн болна. Эн марһанд белдхднь мана гимназин багшнр цуһар нөкд болв, белдсн кичәлд сурһульчнрнь бас орлцв. Хальмг келнә багш Бадм-Хаалһин Екатерина баахн багшд эн марһанд белдвр кехд икәр туслв. Кичәлд олн келн-улсин хәрлцә, иньгллтин залһлда үзүлх кергтә бәәсмн, тегәд бидн хальмг улсин Цаһан Сарин болн орс Масленица байрмудын тускар келҗ өгвидн. Хальмг хувцна тускар эн хуучн домг келәд, бас өөдән кемҗәнд эн даалһвриг күцәв. Мана гимназин багшнр Бадмин Баазр болн Һәрән Байрта дахҗ йовад, марһана йовудт дөңгән күргв. Мана багш марһана даалһврмудыг күцәснә хөөн жюрин гешүд энүг буульҗ, сән белдвр кесиг темдглв. Келхд, Кару Саналовичин экнь Байрта Бембеевна Көтчнрә района Ергенинск сурһульд хальмг келнә багшар көдлҗәнә. Тегәд көвүнь экиннь үлгүрәр хальмг келнә багш болснь байрта йовдл болҗана. Төрскн келнә багшнрин Цугәрәсән марһанд мана гимназин багш Хальмг Таңһчиннь нер дуудулснь маднд ик байр үүдәв. Бидн Кару Саналовичиг цаһан седкләсн йөрәҗәнәвидн,- гиҗ Екатерина Николаевна келв.
ДАВАН Наталья
ЗУРГТ: Хальмг келн-улсин гимназин багш Довуркан Кару болн РАНХиГС-ин сурһуль-эрдмин делгрлтин федеральн институтын (ФИРО) келн-улсин төрмүдин номин-шинҗллтин төвин һардач Ольга Артеменко

Видео