Китд келнәс орчулна

18-03-2021, 17:30 | Таңһчин зәңгс » Сурєуль-эрдм

А. Амр-Санана нертә Келн-улсин дегтрин саң соньн нег харһлтыг бүрдәв. Моһа сарин 3-д энд болсн харһлтд утх-зокъялын орчулврин, эн туст учрдг төрмүдин тускар таңһчин баһ наста бичәчнр күүндвр кев. Билгтә баһчуд дунд Гернзл Сангаджигоряева (видеозалһлдаһар), Тимур Цонхлаев орлцв.
Күндтә гиичнр болҗ бичәчнр Татьяна Бадакова, Виктор Коксадаев үүдәгч баһчудын харһлтд орлцв. Видеозалһлдаг олзлснь бас соньн гих кергтә. Санитарн некврмүдиг күцәхин кергт дегтрин саңгин көдләчнр өдгә цага олн-зүсн янз олзлҗана. Умшачнрла бат залһлда бәрҗәхинь, эднә үүлдврт даңгин орлцдг баһчуд эн саамд чигн керг-үүлдвриг дутасн уга.
Утх-зокъялын үүлдврәр соньмсдг кесг әмтиг эн харһлт хамцулв. Хальмг госуниверситетин хальмг филологин болн дорд үзгин ном шинҗллһнә институтын багш, филологическ номин кандидат Марина Алжеева харһлтд китдин шүлгләнә тускар илдкл кев.
Харһлтд соньн йовдл учрв. Китдин келнәс кесг бичәчнрин шүлгүд орчулҗах Елизавета Абушинова видеозалһлдаһар цуглрсн улсла харһв. Онлайн янзар Элстин лицейин сурһульчнр асхнд орс келнә болн утх зокъялын багш Елена Манджиевала хамдан орлцв. Цагтан эн лицей төгсәсн Елизавета Абушинован шүлгүдин түрүн хураңһуд орсн үүдәврмүдиг эдн умшҗ өгв. Сурһульчиннь түрүн хураңһуг багшнь хадһлсн бәәҗ. Данзан Бембеев, Нарина Матяшева, Алина Сергушкаева, Наталья Цондинова шүлгүдинь умшснь Елизавета Абушиновад йир үүмәтә йовдл болв.
Эн видеозалһлдаһар харһлтд орлцачнрла күүндв. Орчулачнрин үүлдврт харһдг нәрн йовдлмудын тускар, өдгә цага билгтнриг орчулхла соньн олн тоот харһдгнь, терүгинь умшачнрт өвәрцинь медүлҗ орчулхд амр биш болдгин тускар Елизавета тодрхаһар келв.
Ода Пекинд Елизавета Абушинова багшнрин госуниверситетд дамшлт авч көдлҗәнә. Урн үгин үүдәврмүд орчуллһна төрәр кандидатск диссертац эн белдҗәнә.
Китдин сойлар болн утх-зокъялар соньмсад, күүкн китд шүлгчнрин үүдәврмүд орчулдг болсмн. Москвад Горькийин нертә литературн институт эн чиләсмн. Урн үгин халхар мергҗлт авхд эннь йир икәр туслсмн.
Елизавета Абушинован орчулсн китдин шүлгчнрин үүдәврмүд, теднлә кесн интервью Әрәсән болн һазадын орна кесг утх-зокъялын седкүлмүдт барлгдна. Билгтә орчулач болҗ нернь батрҗ йовна.
2020-ч җилд Елизавета Абушинова «Урн үгин орчулвр» гидг номинацд «Шүлглән» гидг утх-зокъялын мөрән марһанд орлцсмн. «Ф-письмо» гидг онлайн утх зокъялын седкүлмүдт редакционн советд Елизавета орна. Әрәсән, Китдин, Латвин бичәчнриг хамцулдг нарт-делкән фестивальмуд бүрдәлһнд шунҗ орлцна.
Тиигәд Элстин лицей төгсәсн күүкн утх-зокъялын хаалһд орад, эврәннь орчуллһна үүлдврәрн Әрәсән болн Китдин утх-зокъялын залһлданд тәвцән орулҗ йовна.
Эн харһлтд орлцсн баһчудт Елизавета Абушинова билгтә баһчудыг утх-зокъялын хаалһд орхднь туслдг сурһулин грантмудын тускар цәәлһвр өгв. Энүнә үүдәгч хаалһ утх-зокъялын үүлдврәр соньмсчах баһчудт күслән күцәлһнә йир сән үлгүр болҗана.
Галина ХЕЙЧИЕВА

Видео