Бичкдүд сенр хот болһдг дасчана

22-03-2021, 17:13 | Таңһчин зәңгс » Сурєуль-эрдм

Таңһчин әмтнә социальн теткврин комплексн төвин һардачин дарук Хинин Светлана һардҗах «Per аspera ad astra» гидг төсвин медлд «Кухнь. Бичкдүд» гидг мастерской секгдв. Җирһлин күнд таалд туссн бичкдүдт дөң күрглһнә туст эн төсв күцәгдҗәнә.

Эн төсвд баһ тетквртә болн олн үртә өрк-бүлмүдин 10 күүкн-көвүн орлцҗана. Терүнә йовудт эдн хулд-гүүлгәнә-технологическ колледжин улд хот-хол болһдг дасч авхмн. Хинин Светлана эн төсвин тускар келҗ өгәд, җирһлин күнд таалд туссн өрк-бүлмүдин насни дигт күрәд уга бичкдүдиг дөңнлһнә халхд күцәгдҗәх керг-үүлдврмүдин тускар хувалцв. Колледжин сурһмҗин төрәр үүлддг ах мастер Очра Роза сурһулин бүрдәцин оютнрин күцәмҗин тускар келв, «WorldSkills» гидг Цугәрәсән болн региональн чемпионатд орлцсн багшнр болн волонтермуд бичкдүдиг сурһхмн болн дөң болхмн гив.
Занятьсин ашар «Вкусняшка» гидг марһан болхмн. Төсвд орлцсн күүкд-көвүд терүнд олн зүсн шимтә болн сенр хот-хол болһҗ үзүлхмн. Темдглхәс, занятьс төгсснә хөөн бичкдүд болһсн хотан амсҗ, хамдан ширә эргҗ сууһад, ямаран шин медрл дасч авсна тускар күүнднә. Түрүн занятьд эдн һуйрин зүүтә хот-хол кеһәд, терүг олн зүсн эв-арһар кеерүлҗ, орс улсин Масленица байриг темдглв.
«Кухнь. Бичкдүд» гидг төсвд орлцсн күүкд-көвүд замчин эрдмлә таньлдсн деерән командын ханьд үүлддгиг, талдан улсла зерглҗ ямр нег төр хаһлдгиг, нег-негндән дөңгән күргдгиг дасч авхмн. Җирһлин күнд таалд туссн бичкдүдт эн занятьс туста болхнь лавта.
Батан Сәәхлә

Видео