Хальмг ик сурһулин ахлачиг йөрәҗәнәвидн

23-03-2021, 17:22 | Таңһчин зәңгс » Күн болн җирһл

Әмтндән герл түгәсн…
Күн болһна җирһл зүсн-зүүл эргцтә, олн җим хаалһта, кегдәд медгдәд уга халхта. Тиим бәәдләс альк халхнь харһхиг, ямаран бәәдләр бәәхиг кен чигн урдаснь тааҗ медшго. Болв эгл өрк-бүлд өсәд-босад, эк-эцкин келсн үгмүдәс зәрминь седклдән буулһад авсн үрн олн дунд йовхларн тенҗ-төөршгонь ил. Эк-эцкнр эңкр үрндән му юм заашго. Теднә седкл медснь җирһлин өөдм һатлад, түрү-күндинь чигн дааһад һархмн болжана.
Олн җилин туршарт Хальмгин һазрт эрдм-сурһулян дасад, ямаран чигн көдлмшән йилһән сәәнәр, кинән кевтәһәр күцәҗ йовх күүнә негнь – номин өөдән нер зүүсн Бадм Катинович Салаев. Эн өдрмүдт Бадм Катинович ончта насндан сән-сәәхн, менд кевәр күрсн бәәнә, Басан Бадьминович Городовиковин нертә Хальмг ик сурһулин ректор болҗ көдлҗәнә. Эндр Әрәсәд сән гисн тоод орулгдсн түшгч вуз болв. Ик сурһулин көдләчнр Бадм Катиновичин һардвртаһар олн марһаст орлцад диилвр бәрцхәв, ачта нерд зүүцхәв. Энд делкән кесг орн-нутгудын баһчуд сурчана, тедн сәәнәр сурһулян сурхднь, гем-шалтг уга бәәхднь багшнр, бәәрн оютнр чигн дөңгән күргнә.
Бадм Катинович тедниг килмҗән өгч, хот-хоолар, мөңгәрн чигн дөңнҗ, төрл-садна авцар хәләнә. Көдлмшән эклхәс урд өрүн болһн оютнрин бәәх бәәринь эргәд хәләнә, дуту-дундынь күцәнә. Тер дунд өдр болһн гишң оютнрин эк-эцкнр үрдиннь тускар соньмсна, ректорла харһҗ күүндцхәнә. Таңһчд болҗах олн керг-үүлдврмүдт Бадм Катинович дутл уга орлцна, Улсин Хуралын депутат болад, суңһачнрин даалһвр күцәнә. Мана ик сурһулин багшнрин номин халхар кеҗәх ик көдлмш Әрәсәд бәәтхә, нам талдан орн-нутгудт нернь һарад, келн-улсин хоорндк иньгллт батрад йовна. Элстд болсн нарт-делкән конференцст, фестивальмүдт КГУ-н номтнр болн оютнр ниитәһәр орлцҗ, хальмг келн-улсин заң-бәрциг, авъясмудыг өргнәр үзүлҗ чадна. Тернь Бадм Катиновичин чадмг, дамшлтта һардвр болҗахнь ил медгдҗәнә.
Тегәд чигн хамдан көдлжәх улснь эврә һардачан йир икәр күндлнә, тевчнә, келсн-заасинь маһд уга күцәнә. Тер учрар кен-негнәннь көдлмшин ашнь чигн үзмҗтә, темдгтә болна. Олна көдлмшт орлцҗ йовсинь, олн җилмүдт сурһуль-эрдмин номин, сойлын болн спортын министерств чадмгар толһалад үүлдҗ йовсинь таңһчин улс ода чигн тодлна. Зуг төрскн теегиннь җирһл ясрулхар, ни-негн бәәдл батрулхар, баһчудан чик хаалһд орулхар Бадм Катинович кезә чигн санан-седкләрн зүткҗ йовхнь темдгтә.
Күндтә Бадм Катинович!
Таниг йир икәр күндлҗ йөрәҗәнәв.
Цевр-цер кевәрн цаһан хаалһдан һарад,
Үнтә өдриннь цолыг ухан-эрдмәрн эзлсн,
Әмд җирһлин бәәдлиг айсинь орулад цутхсн,
Альхн деерк оддасн әмтндән герл түгәсн,
Ач иктә Танд Деедсин евәл күрттхә!
Шугран Вера,
хальмг олн-әмтнә шүлгч

Видео