«Эрдэм» диктант әмтиг соньмсулв

25-03-2021, 17:15 | Таңһчин зәңгс » Сурєуль-эрдм

Бурят келәр бичгддг эн диктант җил болһн кегднә. Забайкальск крайд түрүн болҗ эн керг-үүлдвриг эклсмн. Эн җил диктант орн-нутгин кесг һазрар бәәдг, һазадын орнд бәәрән олсн бурятмудыг чигн хамцулв. Ут тоодан 3905 кү орлцулсн диктантыг Әрәсән 20 балһсдар бәәдг, һазадын 12 орнд бәәдг бурятмуд бичв.


Эн ик көдлмш бүрдәсн олн күн, тер тоод куратормуд, волонтермуд, бурят келнә багшнр, талдан һазрт бәәдг бурятмудын бүрдәцсин элчнр аһу ик үүлдвр күцәснә тускар Забайкальск крайин правительствин ахлачин дарук, Агинск-Бурятск округин ахлач Буянто Батомункуев келнә.
Санкт-Петербургд бәәдг бурятмудын бүрдәцин ахлач Эрдэм Очировин тоолврар, иим керг-үүлдврмүд йир кергтә. «Эннь мадниг хамцулҗана» гисн тоолвран эн медүлв. «Эннь нег күүнә керг биш, иим аһу ик көдлмш күцәхин төлә хамцу үүлдх кергтә. Серлтә улсин иим ик негдлт үүлдснь ик чинртә болҗана», – гиҗ РАНХиГС-ин Читинск филиалын экономикин, залврин болн зөв-йосна кафедрин доцент Баира Нимаева эн йовдлыг үнлв.
Цугбурятск диктант эн җил йир олн бурятмудыг хурав. Бурятин 18 районд диктант бичлһнә 110 бәәрн көдлв. Агинск округд тиим 62 бәәрнд, Усть-Ордынск округд 35 бәәрнд әмтн диктант бичв. Иркутскд хойр бәәрнд шүүвр кегдв. Нерюнгри балһснд, Айхан селәнд, Анадырьт, Ярославльд бәәх бурятмуд онлайн янзар диктант бичлһнд орлцв.
Москвад, Санкт-Петербургд, Казаньд, Новосибирскд, Саха-Якутин Мирный селәнд, Екатеринбургд, Салехардт чигн бурятмуд диктант бичв.
Һазадын орнд бәәх бурятмуд чигн эн керг-үүлдврәс дутсн уга. Онлайн янзар США-н кесг балһснас, Великобританя Кембриджас, Францин Ницца балһснас, Моңһлас, Малайзияс, Кореяс, Израиләс, Испаняс, Прибалтикас, тенд бәәдг бурятмуд эн керг-үүлдврт орлцв.

Видео