Цецгүд җирһлинь сәәхрүлнә

27-03-2021, 17:44 | Таңһчин зәңгс » Күн болн җирһл

Таңһчин әмтнә социальн теткврин комплексн төвд «Гарденотерапия» гидг көтлвр күцәгдҗәнә. Терүнд орлцҗах медәтнр олн зүсн цецгүд урһаҗ, цаган тустаһар болн сергмҗтәһәр давулна. Эдн цецгүд урһалһна туст дамшлт хоршаҗ, хоорндан сүв-селвгәрн хувалцҗ, тааста кергәр соньмсна. Дәкәд эннь медәтә улсин эрүл-менд батруллһнд туслна гиҗ эн көтлвр күцәлһиг һардҗах комплексн төвин көдләч Галина Трухина келнә.


- Эн көтлврт мана медәтнр шунмһаһар орлцна. Бидн урднь ээҗнр урһасн цецгүдин һәәхүл бүрдәдг биләвидн. Эдн ямаран цецгүд урһаҗахан, терүг ямр кевәр асрхинь, күүнә эрүл-мендд тедн ямаран тус күргдгинь хувалцҗ келдг билә. Пандемий эклсн цагас авн мана төвд керг-үүлдврмүд давулгддган уурв, юңгад гихлә 65 наснас ах улс гертән бәәх зөвтә. Болв мана медәтнр өдгә цага эв-арһс олзлҗ хоорндан бат залһлда бәрнә. Хальдврта гемәс саглад гертән бәәсн цагиг медәтнр тустаһар давулҗ, тааста кергән хайсн уга. Хәрнь, кесгнь медрлән гүүдүлҗ, шин цецгүд урһаҗ чадв, – гиҗ Галина Дмитриевна келнә.
Эн көтлврин шунмһа орлцачнр дунд Валентина Николаевна Ткачева бәәнә. Эн бийнь Коми һазрас болна, Ухта балһснд өсәд-боссмн. Тәвн җил хооран эн баахн мергҗлт болад Хальмг Таңһчур ирҗ, энд нефть хәәдг халхд күч-көлснә хаалһан эклсмн. Хальмг теегт эн хөвән олад, хамдан көдлҗ йовсн Николай Ткачевла ханьцад өрк-бүлән өндәлһсмн. Тиигәд хол Коми һазрас ирсн баахн Валентина энд иҗлдәд үлдв. Хальмг Таңһч энүнд төрскн һазр болв, энд хойр көвүнь өсв. 2008-ч җилд Валентина Николаевна ачта амрлһнд һарв, олн-әмтн дунд бәәһәд дассн күүкд күн гертән хара удан бәәҗ чадсн уга. Тегәд эн әмтнә социальн теткврин комплексн төвд ирәд, энд талдан медәтнрлә хамдан билг-эрдмин, чик авг-бәрцин, һарин эрдмин негдлтд ордг болв. «Гарденотерапия» гидг көтлвр эклхлә эн цецгүд урһалһна кергәр соньмсв.
- Цецгүд урһасн цагтан би теднлә күүндәд, арднь орҗ сәәнәр асрнав. Ямаран таалд сәәнәр урһдгиг, һазртнь ямаран ясвр орулх кергтәг, талдан ааһ-савд кезә суулһхиг сарин литд сән өдр кезә болхиг умшнав. Өдгә цагт интернетд олн зүсн зәңг барлгдна, цецгүд урһадг улсин видео бәәнә, тегәд цугинь олҗ авад теднә сүв-селвг оньгтан авнав. Цецгүд сәәнәр урһхин төлә терүг эвләд, цаһан седклән медүлх кергтә. Зуг зәрмдән гемнәд мууһар урһҗах цецгудиг уурлсн бәәдл һарһхла, тер келсиг медсн болад дарунь ясрна. Одахн нег блогерин видео хәләһәд, цецгүдиг халун усар уһахла дурта болдгинь медәд алң болв. Терүнә селвгәр зәрм цецгүдән халун усар уһаҗ үзв, хәләхнь тедн әмдрәд, сәәнәр урһдг болв. Тиигәд олн зүсн шин эв-арһс медҗ авч тедниг олзлнав, – гиҗ Валентина Николаевна келв.
Авалиннь тааста кергиг герин эзн Николай Николаевич дөңнәд, цецгүд тәвх таг кенә, шам углҗ тәвнә. Эднә һурвн хората патьрт өрә болһнднь болн балконд олн зүсн цецгүд урһна. Валентина Николаевна пеларгония, бегония, фиалка, фикус цецгүдт дурта болхла Николай Николаевичд кактус таасгдна. Тегәд эднә герт олн зүсн кактус бас бәәнә. Көвүднь болн бернь гиичд ирхләрн эднд шин цецгүд авч ирнә. Дәкәд медәт олн зүсн зер-земшин яс урһана. Ода эднә герт авокадо, лимона, апельсина яснас урһсн модд бәәнә. Аглаонема гидг цецг урһаҗ авх санан бәәнә гиҗ медәт хувалцв. Пандемий учрад олн-әмтн цуглрдг һазрт оддг арһ уга болад, медәт цецгүд хулддг лавкин багд бичгдәд, тедн давулдг марһаст орлцдг болв. Тиигәд эн терүнд орлцад, хойр дәкҗ цецгүд шүүҗ авв. Дигтә мадниг ирхин өмн энүнд цецг шүүҗ авсна туск байрта зәңг ирв.
«Гарденотерапия» гидг көтлврт орлцсн медәтнр тааста кергәр соньмссн деерән удан цагтан эрүл-менд, чаңһ-чиирг бәәнә. Цецгүд асрсн цагтан шин медрл хоршана, талдан улсла хәрлцнә, эднә седкл төвкнүн бәәнә, эдн эн кергт оньган тусхаҗ, цаган тустаһар давулна. Тегәд цецгүд эднә җирһлиг сәәхрүлсн деерән насинь утдулна гиҗ келҗ болҗана.

ДАВАН Наталья
ЗУРГТ: Валентина Николаевна цецгүдән услҗах кем
Авторин цоксн зург

Видео