Нег һазра улс йөрәв

30-03-2021, 16:45 | Таңһчин зәңгс » Күн болн җирһл

Давсн амрлһна өдрмүдт Элстд Советск Союзин болн Хальмгин Герой, генерал-лейтенант Очра Валерийин 70 җилин өөнд нерәдгдсн керг-үүлдврмүд болв. Моһа сарин 22-т ончта өөнд күрсн мана нег һазра күн төрскн таңһчдан өөнән темдглхәр ирв. Нер һарсн генерал хотл балһсна сурһульчнрла харһв, байрин концертд орлцв.

Элстин 10-ч тойгта сурһульд Советск Союзин болн Хальмгин Герой Очра Валерий күүкд-көвүдлә харһҗ, цергә хаалһин туск тодлврмударн хувалцв. Сурһульчнр күндтә гиичд олн төрәр сурвр өгч, күүндврт шунмһаһар орлцв. «Юнармия» гидг баһчудын җисәнд орлцачнр сурһульд бичкдүдт төрскнч сурһмҗ өглһнә халхар ямаран көдлмш күцәгдҗәхин туск видео үзүлв, музейин хүүвин гешүд болхла экскурсь бүрдәв. Күндтә гиичнрин оньгт «Мана цагин баатрмуд» гидг экспозиц үзүлв, терүнд 80-90-ч җилмүдт Очра Валерий эн сурһулин күүкд-көвүдлә ирҗ харһсна тускар келгдҗәнә. Элст балһсна администрацин толһачин дарук Васькина Галина Валерий Николаевичиг Хальмгин Геройин нер зүүлһснлә болн очнта өөнләнь йөрәҗ, хальмг шүлгчнрин үүдәврмүд чееҗәрн айслулҗ умшв. Харһлтд таңһчин одмн, Хальмг Таңһчин Толһачин селвгч Манҗика Эрднь, Элст балһсна сурһуль-эрдмин заллтын һардач Эрнҗәнә Арслан, Хальмгин хазгудын медәтнрин хүүвин гешүд орлцв.
Асхар Басңга Баатрин нертә Келн-улсин театрт Очра Валерийин өөнин асхн болв. Терүнд Хальмг Таңһчин Толһач Хаска Бату орлцад, нер һарсн генералыг өөнләнь йөрәв.
- Мана баатр, мана бахмҗ болн олнд үлгүр болҗах нег һазра күн төрскн һазртан ирҗ өөнән темдглҗәхд бидн байрта бәәнәвидн. Валерий Николаевич өөдән мергҗлтин болн залу-зөрмгин үлгүр, Әрәсән ачта цергә летчик, төрскн һазртан эңкр күн болна. Энүнә арһ-чидл болн цецн ухан маднд шин керг күцәхд омг өгнә. Валерий Николаевич таңһчин төлә аһу ик керг күцәнә, бидн хамдан Хальмгин болн Әрәсән делгрлтин төлә шаңһа төрмүд хаһлнавидн, – гиҗ Бату Сергеевич йөрәлин үгдән темдглв.
Хальмг Таңһчин Толһачин зәрлгәс иштә Очра Валерийд Хальмгин Геройин нерн зүүлһгдв, өөдән ачлвриг Хаска Бату һарсн өдрләнь бәрүлҗ өгсн билә.
Хальмгин Геройин өөдән нер энүнд зүүлһснь ик дааврта, байрта болн ачта болҗахиг Очра Валерий үнләд, ач-тусинь темдглснд ханлтан өргв. «Эн орден Хальмгин улс болн та бийтн намаг күндлдгиг медүлҗәнә. Хальмг улс төрскн келән, сойлан болн авъясмудан бичә марттха. Әрәсән олн улсин дунд нарт-делкәд мадн өвәрц болн соньн улс болҗахиг үзҗ йовтха», – гиҗ Валерий Николаевич ханлтта бәәхән медүлв.
Өөнин керг-үүлдврт орлцачнрин оньгт Очра Валерийин җирһлин болн үүдәлтин хаалһин туск фильм тусхав. Хальмгин Келн-улсин оркестрин болн «Өөрднр» гидг бииһин театрин артистнр билг-эрдмән үзүлҗ, байр үүдәв.

ДАВАН Наталья

Видео