Олн үртә экд – өөдән ачлвр

13-04-2021, 16:37 | Таңһчин зәңгс » Күн болн җирһл

Одахн күүкд улсин күчн-чидлин ниицән «Эк героинь» гидг олна мөрән Цугәрәсән марһана аш диглв. Терүнд Элст балһснд бәәдг олн үртә эк Хоҗһра Саглр «II девсңгин эк героинь» гидг мөрән лауреат болв.

Хоҗһра Юрий болн Саглр хөрн һар җилдән ниитә бәәнә, олн-әмтн дунд тоомсрта болн күндтә улст тоолгдна. Эдн зурһан үр асрҗана, теднәснь һурвнь асрлһнд авгдсн күүкд болна. Саглр Сергеевна өнр-өсклң өрк-бүлд өссмн. Бийнь эн Үстин района Бергн селәнәс. Эн уячин эрдмтә. 2015-ч җиләс авн күүкд күн эврә керг бүтәһәд, онц арһлач болҗ үүлддг болв. Юрий Витальевич эк-эцкдән ор һанцхн үрн болна. Эрдмәрн эн юрист, 1999-ч җиләс авн 2013-ч җил күртл таңһчин дотр-дундын кергүдин органмудт көдлҗ йовсмн. Ода бас арһлач болҗ үүлдҗәнә. Эк-эцк хойр күүкдтән сән сурһмҗ өгч, эврә чик авг-бәрцәрн, үнн хәләцәрн үрдтән үлгүр болхар шунна. Темдглхәс, күүкднь цуһар сурһулян сәәнәр сурна, олна бәәдл-җирһлд шунмһаһар орлцҗ, үүрмүд дундан оньдин нүүрт йовна.
Занда күүкнь Элстин лицейиг йилһән сәәнәр төгсәһәд, алтн медаляр ачлгдсмн. Эн 2-ч тойгта билг-эрдмин сурһульд олн-әмтнә зевсгүдин әңгиг улан дипломтаһар төгсәв. Күүкн «Байр» гидг бичкдүдин ансамблин ханьд Финляндь болн Испань орн-нутгудт болсн нарт-делкән фестивальмудт орлцҗ, билг-эрдмәрн марһана жюриг авлв. 2015-ч җилд эн XIV Дала Ламин гегәнә 80 җилин өөнд болн Бурхн Багшин Алтн сүмин өөнд нерәдгдсн һурвн эрдньд көгҗмәр белг бәрүллһнд орлцсмн. Ода Занда Москва балһснд Сеченовин нертә медицинск институтд эмчин эрдм дасчана. Очр көвүнь эгчәсн үлгүр авч бас сурһулян сәәнәр сурч, Элстин техническ лицейин сән гисн сурһульчнрин тоод йовсмн. Көвүн бичкнәсн авн спортар соньмсҗ, бөк бәрлдәнә, боксин марһаст орлцҗ, кесг ачлврар темдглгдсмн. Ода көвүн Москвад Әрәсән правительствин медлд финансов университетд юристин эрдм дасчана. Алиса күүкн ода Элстин техническ лицейд 9-ч класст сурчана. Эн бас бичкнәсн авн үүдәлтин халхар күцәмҗ бәрҗ йовна. Күүкн «Өөрд» гидг бииһин ансамбльд орлцдг бәәсмн, дәкәд эн сәәнәр зурна, сенр болн шимтә хот-хол болһхдан дурта. Иргчдән эн эгчиннь үлгүрәр эмч болхар зуралҗана.
Цөөкн җил хооран Саглр Сергеевнан эгчнь сәәһән хәәхлә, эн һурвн зееһән асрлһнд авв. Константин болн Адьян Элст балһсна 12-ч тойгта сурһульд сурна. Көвүд бас билгтә бичкдүд болҗ өсчәнә. Наһц эгчнь эднд килмҗән тусхаҗ, һарлдсн үрдлә әдл таалҗ хәләнә. Костя зург зурхдан, биилхдән болн футбол наадхдан дурта. Адьян болхла эсвин халхар гүн медрл үзүлҗәнә, бас биилнә, сул цагтан Lego цуглулж олн зүсн кегдл кенә, эн бийнь келврмүд бичнә. Бичкн Настя Элст балһсна 18-ч бичкдүдин садт орна. Күүкн бас биилх-дуулх, зург зурх билгтә. Тегәд өөрхн иргчдән эдн билг-эрдмин эс гиҗ спортын халхар бас нер һархнь лавта.
Бичкдүдиг харслһна нарт-делкән Өдрлә Москва балһснд «Эк героинь» гидг олна мөрән Цугәрәсән марһанд диилвр бәрсн олн үртә экнрт өөдән ачлвринь байрин таалд бәрүлҗ өгхмн. Элст балһснд бәәдг Хоҗһра Саглр олна мөрән лауреат болснь эднә өрк-бүлин болн олн элгн-садна төлә ик байр-бахмҗ болв. Экин ач-тусиг хәрүлҗ болшго гиҗ келнә. Болв иим өөдән ачлвр олн үр асрҗах экнрин ач-тус темдглҗәхнь байрта болна.
ДООҖАН Наталья
ЗУРГТ: ниитә Ходжигоровихнә өрк-бүл

Видео