Ар Осетин һазрт билгән үзүлв

13-04-2021, 16:56 | Таңһчин зәңгс » Сойл

Ар Осеть – Алания Республикд Хальмг Таңһчин сойлын өдрмүд болсна тускар таңһчин сойлын министерствин барин цергллт зәңглҗәнә. Алания Республикин Келн-улсин музейд «Теегин иньг хальмг» гидг нерәдлһтә һәәхүл секгдв. Терүнд хальмг зурачнрин олн-зүсн янзар зургдсн, дүрслүлгдсн, өдгә цагин янзар кевлгдсн, нань чигн, ут тоодан 68 зург тәвҗ үзүлгдв.

Сойлын өдрмүд секлһнд Ар Осеть-Алания Республикин келн-улсин хәрлцәнә төрәр үүлддг министр Аслан Цуциев, Келн-улсин музейин директор Батроз Цогоев, Осетин зурачнрин Ниицәнә ахлач Таймураз Маргиев орлцв. Келн-улсин хоорндк хәрлцәг делгрүллһнд, сойлын залһлдаг батллһнд иим керг-үүлдврмүд туслдгинь эдн темдглв.
Хальмгин халхас эн керг-үүлдвриг бүрдәснь таңһчин зургудын галерейин ахлач Людмила Мошулдаева, Хальмг Таңһчин билг- эрдмин ачта үүлдәч Татьяна Милованова һарддг театрин артистнр хальмг келн-улсин хувцнь ямаран сәәхн болдгиг үзүлв. Таңһчин улсин җаңһрч Владимир Каруевин дуулсн дуулвр теднд йир өврмҗтә соньн болв.
Сойлын залһлдана күчн ямаран болдгинь Хальмг Таңһчин ачта артистнр Мергн Ким болн Данара Шалханова Ар Осетин нертә артистнрлә хамдан дуулсн дуд медүлв.
Ар Осеть-Алания Республикин государственн академическ драматическ театрин тәәз деер «Өөрднр» бииһин театрин артистнр хальмг бииһин эрдмәрн цуглрсн әмтиг байрлулв.
Мөрн сарин 16-д Ар Осеть Алания Республикин делегац Хальмгт ирхмн, Н. Пальмовин нертә Келн-улсин музейд эднә зурачнрин һәәхүл секгдхмн. Цуг эннь хойр региона хоорндк сойлын залһлдаг улм батлхнь маһд уга.

Видео