Осетинск зурачнрин һәәхүл

15-04-2021, 16:01 | Таңһчин зәңгс » Сойл

Ар Осеть-Алания Республикин зурачнрин «Осетинский колорит» нерәдлһтә һәәхүл мɵрн сарин 16-д Н. Пальмовин нертә Келн-улсин музейд секгдҗәнә.
Хальмг зурачнрин һәәхүл Ар Осетьд секгдснә тускар урднь бичләвидн. Ода болхла хоша бәәдг республикин зурачнрин үүдәврмүдлә таньлдх таал таңһчин әмтнд учрҗана.

Осетинск зурачнрин һәәхүл

Осетинск зурачнрин үүлдвр Цугәрәсән дүрслгч билг-эрдмин кемҗәнд эврә зөвтә орман эзлҗәнә. Төрскн һазрин бәәдлиг, эврә һазран күч-көлсәрн сәәхрүлҗәх әмтн, улсин билг-эрдм, заң-авъясмуд, эндрк цага республикин бәәдл осетинск зурачнрин үүлдврт орман олсмн. Элстд үзүлгдх 100 һар үүдәврт цуг тер тоотнь орман олсн бәәнә. Ар Осеть Алания Республикин җирһлиг болн әмтиг үзүллһнд нер һарч олнд темдгтә болсн М. Келехсаевин, Р. Нартин, М. Джикаевин болн ах үйин зурачнрин үүдәврмүд хәләһәчнрин оньгт тәвгдҗәнә.
Күүнә җирһлд цагин йовуд ямаран нилчән күргсинь Т. Маргиевин, О. Басаевин, А. Калмановин болн дундын наста нань чигн зурачнрин үүдәврмүдәс медҗ болхмн. Шин хәләцтә билгтә олн баһчуд Ар Осетин ик сурhулин билг-эрдмин факультет төгсәһәд, зурачнрин бүлд орҗана. А. Евграфовин, В. Гасиевин, З. Дзугаевин болн баһ наста нань чигн зурачнрин үүлдврлә таньлдх таал таңһчин хәләһәчнрт учрҗана.
Ашлад келхлә, «Осетинский колорит» нертә һәәхүл мɵрн сарин 16-ас авн хɵн сарин 10 күртл көдлхмн.
ҖИРҺЛИН Кермн

Видео