Санзра Ирина марһанд диилвр бәрв

29-04-2021, 15:11 | Таңһчин зәңгс » Күн болн җирһл

Шидр Элст балһснд «Җилин күн» гидг марһана аш диглгдҗ, сурһуль-эрдмин, эрүл-менд харлһна, тосхлтын, жилищн-коммунальн, сойлын, волонтерск җисәнд күцәмҗ бәрсн улсин ач-тус темдглгдв. Номинац болһнд олн халхд көдлҗәх улс түрүн болҗ давулгдсн марһана дииләчнр болҗ, шишлң темдгәр ачлгдв. «Эрүл-менд харлһна халхд тәвцән орулсн төләдән» гидг номинацд «Шишлң медицинск дөң күрглһнә таңһчин төв» гидг эмнлһнә эмч Санзра Ирина диилвр бәрв.

Ирина Борисовна хөр һар җилдән хальдврта гем эмнлһнә халхар көдлҗ йовна. Эн Приютна района эмнлһнд күч-көлснә хаалһан эклсмн. 2006-ч җиләс авн таңһчин хальдврта гемин эмнлһнд көдлҗәнә. Эн җилмүдин эргцд Санзра Ирина өөдән мергҗлттә болн байн дамшлтта эмч болад, хамдан көдлҗәх үүрмүд болн эмнлһ авчах улс дунд күндллһ олв. Эн олн зүсн хальдврта гемиг илдкҗ авлһна, терүнәс эдгәлһнә туст өдгә цага эв-арһ олзлҗ үүлддг эмч гиҗ тоолгдна. Эн ВИЧ-гем илдклһнә болн терүнәс хөрлһнә туст байн дамшлт хоршав.
Давсн җилд мана җирһлд шин коронавирусн гем тархагдҗ олн-әмтнд ик әәмшг учрадг болв. Санзра Ирина түрүн зергләнд эн әәмшгтә гемәс хөрлһнә керг-үүлдврт орлцҗ, коронавирусн гемәр гемтсн улст дөңгән күргҗ йовна. Ирина Борисовна 2020-ч җилд таңһчин бичкдүдин үүдәлтин төвин улд коронавирусн гемәр гемтсн улсла хәрлцсн әмтнә төлә секгдсн түрүн изоляториг һардв. Тер изоляторин ормд тенд секгдсн 4-ч тойгта госпиталиг давсн җилин хөн сарас авн эндр өдр күртл эн һардҗана. Энүнә чадмг һардврт энд кергән сәәнәр меддг болн дамшлтта эрүл-менд харлһна көдләчнр үүлдҗ, коронавирусн гемәр гемтсн улст килмҗән тусхаҗ өөдән чинртә медицинск дөң күргҗәнә. Бийинь дахҗ энд цаһан седклтә, әмтнлә тевчңгү, сәәхн заңта улс көдлҗәнә гиҗ энд эмнлһ авсн улс эдгәд хәрхләрн темдглнә.
Шидр Әрәсән Президент Владимир Путин Федеральн Хургт кесн Илгәврт хамгин түрүнд эрүл-менд харлһна болн социальн көдләчнрт эн хальдврта гемәс хөрлһнә кергт тәвцән орулсиг темдглҗ, күн болһнд ханлтан өргсн билә. Санзра Иринала әдл тиим улсин ач-тусар кесг күн эн әәмшгтә гемәс эдгҗ, күнд өвчиг диилҗ чадснь лавта. Тегәд Ирина Борисовнан келсәр, «Җилин сән гисн күн» гидг марһанд энүнд «Эрүл-менд харлһна халхд тәвцән орулсн төләдән» гидг номинацд темдглснь таңһчин цуг эрүл-менд харлһна көдләчнрин, хамдан көдлҗәх үүрмүдин ач-тус бас болҗана.
БАТАН Наталья

Видео