Билгтǝ күүкн Һǝрǝн Делгр

29-04-2021, 15:16 | Таңһчин зәңгс » Күн болн җирһл

Шидр давсн «Җилин күн» муниципальн марһана дииләчнрин тоод баһ наста күүкн Һәрән Делгр заагдв. Делгр дииләчнр дунд хамгин баахн орлцач болв. Зуг насарн баһ болвчн билг-эрдмәрн цугтаһаснь түрүлҗ чадв.
Билгтǝ күүкн 2003-ч җилд Элстд Санл болн Майя Горяевихнǝ ɵрк-бүлд ууhн үрн болҗ тɵрсмн. Бичкнǝсн авн шулун-шудрмг, ɵвкнрин авъяс-заңшал ээҗǝсн соңсад, бийдǝн шиңгǝҗ ɵссн күүкн мɵн. Дунд сурhульдан олн керг-үүлдврмүдт, марhаст эврǝ дурарн орлцҗ, бийǝн сǝн таласн үзүлǝд йовдг сурhульч болсмн. Дунд классмудт региональн халхар давулгддг марhаст даңгин орлцад, нүүрлгч ормс эзлсмн. 2017-ч җилд Элстин С. Г. Дорджинǝ нертǝ 1-ч тойгта билг-эрдмин школын «Хальмг домбр» классар сурhулян йилhǝн сǝǝнǝр сурад улан дипломтаһар тɵгсǝв. Таңhчин бичкдүдин үүдǝлтин Цутхлңд хойр җилдǝн сурад, бииhин эрдм дасҗ авсмн. 2018-ч җилд Һǝрǝн Делгр Хальмг Таңhчин Толhачин мɵрǝhǝр ачлгдв. «Одна дольган», «Хальмгин сувсн», «Баh наста билгтнр», «Хамдан», «Теегин айс», «XVI-ч Дельфийск наадд» болн нань чигн керг-үүлдврмүдт авсн ачлврмуднь ɵɵрхн улсиннь тɵлǝ ик байр-бахмҗ болна.
Делгр – кɵгҗмч, хальмг болн орс дуд дуулхдан дурта, домбр болн гитар цокна, шавашмуд хайна. Ɵрк-бүлднь учрсн байрта ɵдрмүдт Делгр домбр цокад, ду дуулад, элгн-садан байрлулна. Ɵдгǝ цагт Делгр Элстин 12-ч тойгта дунд сурhулин 11-ч классин сурhульч мɵн. Ода деерǝн ЕГЭ-н шүүврт күцц кевǝр белдҗǝнǝ. Тегǝд эн баахн билгтǝ күүкн шүүврǝн йилhǝн сǝǝнǝр ɵгч, иргчдǝн аав-ээҗиннь, таңhчиннь нерǝн дуудулҗ йовхнь лавта.

КАРСАНА Евгения

Видео