Дәәнә җилмүдт төрсн «Нүүдлә»

13-05-2021, 14:51 | Таңһчин зәңгс » Сойл

Дәәч болн артист Җимбин Бадм дәәнә җилмүдт үүдәсн «Нүүдлә» дун Диилврин өдр Хальмгин хотл балһснд доладгч давхр өндрәс күңкнҗ, олн улсин оньгиг авлв. Өдгә цагт хальмг улсин дун болҗ тохрсн дууна айс дәәнәс эс хәрҗ ирсн салдсмудын санлд нерәдгдҗ балһсн деегүр тарв. Хальмг улсин артистк Очкан Анна дуулсн дун кесг тоотыг әмтнә санлд сергәв.
Келн-улсин симфоническ оркестр болн А. Цебековин нертә Государственн хорин солистнр эн өдр Элст балһсна һардврин герин ора деер болсн концертиг бүрдәв. Нертә дуучнр Лиҗин Эвелина, Дорҗин Лиҗ, Месхишвилин Инесса эн концертд орлцв. «Катюша», «Едут по Берлину казаки», «Эхо любви», «Растет в Волгограде березка», болн нань чигн дуд, «А зори здесь тихие» гидг фильмд орсн романс эн өдр дәәнә цагиг тодлулҗ, олна оньгт тусхагдв.
Диилврин өдрлә төвкнүн сәәхн Элстд дәәнә цага дуд Хальмгин хотл балһсиг немш деермчнрәс сулдхсн 28-ч Әәрмин цергчнрин баатр үүлдвриг тодлулсн болв.

Видео