«Даван делкәд»

20-05-2021, 16:38 | Таңһчин зәңгс » Сойл

Н. Пальмовин нертә Келн-улсин музей 100 җилин өөндән нерәдҗ, «Даван делкә» («Мир Давида») гидг зургудын марһа зарлсн билә. Иргчдән болх Көглтин Даван 100 җилин өөниг угтҗ, регионмуд хоорндк соньн марһан бүрдәгдв. Хальмгин олн-әмтнә шүлгч Көглтин Даван нерн кезәнә таңһчин меҗә давад, цуг делкәһәр тарсмн. Сансрт күрч эврә одта болсмн. Тегәд марһан «Даван делкә» гиҗ нерәдгдснь учрта юмн.
Умшач болһнд Көглтин Даван шүлгүдин туск эврә тоолвр бәәнә. Әрәсән Өмн үзгин, Москван зурачнр чинртә марһанд орлцҗ, келнә билгтин үүдәврмүд эднә тоолврар ямаран болдгинь зургударн медүлв.
Ут тоодан 44 зург жюрин хәләврт орҗ ирв. Хальмгин зурачнрас нань Москван, Әәдрхнә, Ар Осетин болн нань чигн һазрин зурачнр марһанд орлцҗ, хальмг шүлгчин үүдәврмүд теднә җирһлд ямаран орман эзлсинь, үүдәлтднь ямаран нилчән күргсинь шишлң зурсн зургудтан үзүлв.
Дурна седкл, йиртмҗин бәәдл йилһән сәәнәр шүлгүдтән үзүлсн деерән, хальмг билгт цуг делкәг үүмүлҗәх төрмүдиг, күүнә әмдрлд учрдг йовдлмудыг гүн тоолвртаһар, өвәрц янзтаһар үзүлсн төләдән хальмг, орс утх-зокъялд зөвтә тәвцән орулсн деерән цуг делкән урн-үгин зөөрт шүлгләни үүдәлтәрн чинртә тәвцән орулсмн.
«Җаңһрч күүкн» гидг зург зурсн Әрәсән ачта зурач Пован Александр марһана негдгч орм эзлв. Хойрдгч орм хойр зурачд күртв. Тернь - «Көглтин Дава» зург зурсн Чудута Олег, «Һурвн насн» гидг зургин зокъялч Хаҗинә Юрий. Һурвдгч ормиг Ар Осетин зурач Роберт Каркусов эзлв. Энүнә зург – «Хаврин айсмуд» («Весенние ритмы») гиҗ нерәдгднә.
Баһ наста зурачнр-сурһулин заведеньсин оютнр чигн марһанд орлцв. Эднә номинацд П. Чонкушовин нертә билг-эрдмин колледжин хойрдгч курсин оютн Бүүрчин Александра зурсн зургиг жюри ончлҗ темдглв.
Келн-улсин музей 100 җилин өөнән темдглсн байрин өдрмүдлә марһана аш диглгдҗ зургуднь өөдән үнлгдсн зурачнрт мөңгнә мөрә болн дипломс бәрүлҗ өггдсмн.
«Көглтин Дава шүлгләни дүр болҗ әмтнә седклд орҗах хальмг һазр болҗана», – гиҗ жюрин гешүн, билг-эрдмин номин доктор, Әрәсән художественн Академин гешүн-зәңгч Баатра Светлана келсн үгмүд эн марһана чинриг тиигҗ медүлҗәнә.

ҖИРҺЛИН Кермн

Видео